Հակակարկտային կայաններն աշխատում են, բայց կայանների արդյունավետության մասով պետք է նշել, որ կան ամպեր, որոնց դեպքում թնդանոթային համակարգերի արդյունավետությունը 100 տոկոս չէ: Կան ամպեր, որոնց դեպքում 100 տոկոսանոց է, ու բազմաթիվ դեպքեր են լինում, որ փրկում են իրավիճակը: Այդ մասին Կառավարության ճեպազրույցի ժամանակ ասաց ՀՀ էկոնոմիկայի նախարար Գևորգ Պապոյանը:
Անդրադառնալով հարցին, թե վերջին հորդառատ անձրևների և կարկուտի ժամանակ հակակարկտային համակարգերը կրակե՞լ են, նախարարը պատասխանեց. «Այո՛, կրակել են՝ բացի Արարատի մարզի 1 բնակավայրից, որտեղ, մասնագետների կարծիքով, պատասխանատուների ներկայացմամբ, շատ ուժեղ անձրևային հոսք է սկզբում եղել, որի հետևանքով խնդիր է եղել սարքի աշխատանքի հետ, և սարքը չի աշխատել: Մեկ թե երկու գյուղում եղել է այդպիսի բան, Արարատի մարզ իմ այցելության ժամանակ պարզեցինք: Բայց դրա փոխարեն կողքի 63 համակարգերն ամբողջությամբ աշխատել են»: