Հոկտեմբերի 12-ի երեկոյից մինչև հոկտեմբերի 13-ի առավոտյան ժամը 8:00-ն Ռուսաստանի ՀՕՊ ուժերը «որսացել և ոչնչացրել են» ուկրաինական 604 անօդաչու թռչող սարք երկրի 15 շրջաններում և Ազովի ծովում։ «Արմենպրես»-ի փոխանցմամբ՝ այս մասին հայտնել է Ռուսաստանի պաշտպանության նախարարությունը։
Մոսկվայի քաղաքապետ Սերգեյ Սոբյանինի խոսքով՝ Մոսկվայի մարզի ուղղությամբ արձակվել է 417 ԱԹՍ, որոնցից 65-ը խոցվել է մայրաքաղաքին մոտենալիս։
Ռուսաստանի իշխանությունները նաև հայտնել են Ստավրոպոլի երկրամասի վրա Ուկրաինայի զանգվածային հարձակման մասին, իսկ մարզպետ Վլադիմիր Վլադիմիրովը հայտարարել է Նևինոմիսկի արդյունաբերական գոտում գրանցված վնասների մասին։
Կալուգայի մարզի նահանգապետը հայտարարել է, որ երեկոյան և գիշերը 16 շրջաններում, ինչպես նաև Կալուգայի և Օբնինսկի ծայրամասերում 73 անօդաչու թռչող սարք է խոցվել։
Ուկրաինայի ռազմաօդային ուժերն իրենց հերթին հայտնել են, որ գիշերը Ռուսաստանն Ուկրաինայի ուղղությամբ արձակել է հինգ «Իսկանդեր-Մ/Ս-400» բալիստիկ հրթիռ, ինը «Բանդերոլ/Դան-Տ» փոքր չափի հրթիռ և 108 անօդաչու թռչող սարք։
Հայտարարության համաձայն՝ հակաօդային պաշտպանությունը խոցել է 88 անօդաչու թռչող սարք, գրանցվել են հարվածներ 17 վայրում։
BBC-ի ռուսական ծառայությունը նշում է, որ Խարկովի իշխանությունները հայտնել են «Բանդերոլ» փոքր չափի հրթիռներով զանգվածային հարձակման մասին, որի հետևանքով քաղաքում զոհվել է երեք մարդ, փլուզվել է չորսհարկանի բնակելի շենքի մուտքը։ Վերջին հաղորդագրությունների համաձայն՝ վիրավորվել է ևս 11 մարդ։
Ուկրաինայի իշխանությունները նաև հայտնել են Լվովի վրա ռեակտիվ անօդաչու թռչող սարքերի հարձակման մասին։
Կիևի քաղաքապետ Վիտալի Կլիչկոն առավոտյան գրել է, որ ԱԹՍ-ի բեկորները վնասել են Դարնիցկիի շրջանում գտնվող երկհարկանի մասնավոր տուն։ Քաղաքի ռազմական վարչակազմի տվյալներով՝ վիրավորվել է մեկ կին։
Դնեպրում հարձակման հետևանքով վիրավորվել է 64-ամյա տղամարդ։ Առավոտյան հարվածների հետևանքով վնասվել են տրանսպորտային ենթակառուցվածքների օբյեկտ, բարձրահարկ շենքեր և մեքենաներ։