Մենք հումանիտար կենտրոնում վարչապետի որոշմամբ ստեղծված աշխատանքային խմբում ամենօրյա աշխատանք ենք տանում բռնի տեղահանված մեր հայրենակիցների համար կարճաժամկետ, միջնաժամկետ և երկարաժամկետ աջակցության ծրագրեր մշակելու ուղղությամբ: Այդ մասին պատասխանելով ԱԺ ՔՊ խմբակցության պատգամավոր Զարուհի Բաթոյանի հարցին՝ ասաց փոխվարչապետ Տիգրան Խաչատրյանը:
«Առաջին որոշումները կայացված են. դրանք կարճաժամկետ նշանակություն ունեն, որոնցից մեկն արդեն Կառավարության որոշմամբ երեկ երեկոյան գրավոր քվեարկության ընթացակարգով պաշտոնապես հաստատվեց: Խոսքը 100-հազարական միանվագ դրամական աջակցության մասին է, որը անկախ տարիքից՝ պետք է տրամադրվի մեր բոլոր քույրերին և եղբայրներին: Մենք վաղը Կառավարության նիստում կկայացնենք համապատասխան դրամական միջոցներ հատկացնելու վերաբերյալ որոշումը»,- նշեց փոխվարչապետը:
Կառավարության հաջորդ որոշումը առաջին օրերի ընթացքում բոլոր հնարավոր եղանակներով կացարաններ հատկացնելուց հետո մեր հայրենակիցներին յուրաքանչյուր անձի հաշվով 40 հազար և 10 հազար դրամ կոմունալ ծախսերի համար տրամադրելու որոշումն է:
«Մենք այժմ աշխատում ենք միջնաժամկետ ծրագրերի վրա»,- նշեց Տիգրան Խաչատրյանը: Նա ասաց, որ բարձրագույն կրթություն ստացող ուսանողներին համապատասխան կարգով աջակցություն կտրամադրվի: «Շատ շուտով ԿԳՄՍՆ-ն հանդես կգա համապատասխան պարզաբանումներով»,- ասաց նա:
Խաչատրյանը նշեց, որ ամենամեծ աջակցությունը, որ պետք է ցուցաբերվի մեր հայրենակիցներին, նրանց աշխատանքի տեղավորելն է: «Մենք այս ուղղությամբ ևս ծրագրեր ենք մշակում, և դրանք շուտով կհայտարարվեն և գործի կդրվեն»,- ասաց Տիգրան Խաչատրյանը:
