Հեղուկ վառելիքի (ավտոմոբիլային բենզին և դիզվառելիք) մանրածախ առևտրի կետերում թերլիցքավորման դեպքերը կանխելու նպատակով ՀՀ կառավարությունը 2022 թ. ապրիլի 22-ին ընդունել է «Հեղուկ վառելիքի մանրածախ առևտրի կետերում ստուգաչափված տարաներին ներկայացվող պահանջները, դրանց տեղադրման և կիրառման կարգը հաստատելու մասին» N 537-Ն որոշումը՝ սահմանելով hեղուկ վառելիքի մանրածախ առևտրի կետերում ստուգաչափված տարաներին ներկայացվող պահանջները, դրանց տեղադրման և կիրառման կարգը:
«Հաշվի առնելով այն հանգամանքը, որ չափանոթները հանդիսանում են օրենսդրական չափագիտական հսկողության ենթակա չափման միջոցներ՝ հորդորում ենք մինչև սույն որոշման պաշտոնական ուժի մեջ մտնելու օրը՝ 2022 թվականի հոկտեմբերի 20-ը, ձեր կողմից շահագործվող առևտրի կետերն ապահովել չափանոթին ներկայացվող հիմնական պահանջներին համապատասխանող ստուգաչափված չափանոթով»,- ասված է Շուկայի վերահսկողության տեսչական մարմնի հաղորդագրության մեջ:
Առավել մանրամասն տեղեկատվության համար կարող եք այցելել Հայաստանի Հանրապետության շուկայի վերահսկողության տեսչական մարմնի www.msib.am պաշտոնական կայքէջ կամ զանգահարել 010 23 56 00 թեժ գծի հեռախոսահամարով:
