Հայաստանում Ռուսաստանի արտակարգ և լիազոր դեսպան Սերգեյ Կոպիրկինն այցելել է Սյունիքի մարզ և Հայաստանում ՌԴ ԱԴԾ սահմանապահ վարչության ղեկավարության ուղեկցությամբ հարգանքի տուրք մատուցել Մի 24 ուղղաթիռի անձնակազմին, որը զոհվել է 2020 թվականի նոյեմբերին՝ Երասխի բնակավայրի տարածքում մարտական առաջադրանք կատարելիս:
Դիվանագիտական առաքելության ղեկավարն այցելել է նաև ՀՀ սահմանի Տեղ և Պարույր Սևակ սահմանային անցակետերը, որտեղ հանդիպել է ռուս սահմանապահների հետ, ծանոթացել նրանց ամենօրյա և մարտական պատրաստության առանձնահատկություններին, ինչպես նաև կենցաղային և ծառայության պայմաններին։
Սյունիքի մարզկենտրոնի մատույցների մոտ դեսպանին դիմավորել են Կապանի վարչակազմի ներկայացուցիչները: Քաղաքի բնակչության անունից նրանք շնորհակալություն են հայտնել Ռուսաստանին՝ սոցիալ-տնտեսական զարգացման ծրագրերի իրականացման գործում ցուցաբերած աջակցության, ինչպես նաև տարածաշրջանում անվտանգության ապահովման հարցում սահմանապահների մասնակցության համար:
Դեսպանն այցելել է նաև Կապանի օդանավակայանի մոտ տեղակայված ռուս սահմանապահների դիրքեր։ Մեղրու սահմանապահ ջոկատի պետ, գնդապետ Բուրշտինը դիվանագիտական առաքելության ղեկավարին ներկայացրել է Հայաստանի սահմանի այս հատվածում զարգացող օպերատիվ իրավիճակի առանձնահատկությունները։
