«Պիցցա Տաշիր» ՍՊԸ-ի կողմից Սննդամթերքի անվտանգության տեսչական մարմին ներկայացված դիմումի համաձայն՝ վերահսկողություն է իրականացվում այդ կազմակերպությանը պատկանող բոլոր 30 հանրային սննդի կետերում:
Այս մասին հայտնել են տեսչական մարմնից:
ՍԱՏՄ սննդամթերքի անվտանգության վարչության տեսուչների կողմից «Պիցցա Տաշիր» ՍՊԸ-ի Էջմիածին քաղաքի Մաշտոցի 110 հասցեում գործող մասնաճյուղում անցկացվող ստուգման ընթացքում հայտնաբերվել են սանիտարահիգիենիկ նորմերի խախտումներ.
հանրային սննդի կետի պատերը չեն ունեցել հարթ մակերես, պատրաստված չեն եղել անջրանցիկ, չներծծող, լվացվող, ախտահանվող և ոչ թունավոր նյութերից,
առաստաղները կառուցված չեն եղել այնպես, որ կանխարգելվի կամ նվազեցվի կեղտի կուտակումը, գոլորշու խտացումը և մասնիկների թափվելու հնարավորությունը,
սննդամթերքի պատրաստման, մշակման կամ վերամշակման համար նախատեսված սննդի կառույցների հատակի մի մասը չի ունեցել հարթ-նորոգ մակերես:
Մասնաճյուղի արտադրական գործունեությունը կասեցվել է, խախտումները վերացնելու համար սահմանվել է ժամկետ:
Ավելի վաղ Սննդամթերքի անվտանգության տեսչական մարմնի խոսնակ Անուշ Հարությունյանը, ի պատասխան «Պիցցա Տաշիր» ընկերության մասնաճյուղերում արդեն մի քանի օր շարունակվող ստուգումների և որոշ մասնաճյուղերում աշխատանքի կասեցումների մասին հայտարարությունների, հայտնել է, որ ընկերությունն ինքն է 1-2 շաբաթ առաջ դիմել ՍԱՏՄ՝ մասնաճյուղերում վերահսկողություն իրականացնելու խնդրանքով: