Իլոն Մասկը հայտարարել է, որ ինքը և Թրամփը փակում են USAID-ը. NBC News

Աննա Կոստանյան 3.02.2025 - 14:08
3.02.2025 - 14:08 դիտում

Միլիարդատեր Իլոն Մասկը երկուշաբթի ասել է, որ ինքը և նախագահ Դոնալդ Թրամփը սկսել են ԱՄՆ Միջազգային զարգացման գործակալության փակման գործընթացը՝ սրելով իրենց պատերազմը դաշնային բյուրոկրատիայի դեմ և մարտահրավեր նետելով Կոնգրեսի սահմանադրական լիազորություններին՝ որոշելու, թե ինչպես են ծախսվում փողերը:

Մասկը չի ասել, թե իր կարծիքով՝ ինչ իրավական լիազորություններ ունի Սպիտակ տունը դաշնային գործակալությունը փակելու համար՝ առանց Կոնգրեսի հաստատման, կամ որքան արագ է վարչակազմը նախատեսում գործել:

Թրամփի վարչակազմի պաշտոնյաները քննարկել են ԱՄՆ ՄԶԳ-ն պետքարտուղարության իրավասության տակ դնելու հարցը, հաղորդում է NBC News-ը՝ ըստ քննարկումներին ծանոթ ավելի քան մեկ տասնյակ ներկա և նախկին պաշտոնյաների և աղբյուրների: Այս քայլը, ըստ դեմոկրատ օրենսդիրների և իրավաբան փորձագետների, կխախտի գործակալության ստեղծման մասին Կոնգրեսի ընդունած օրենքը:

Թրամփը հայտարարել է, որ սառեցնում է ԱՄՆ-ի գրեթե ամբողջ արտաքին օգնությունը՝ սպասելով 90-օրյա վերանայման։ Հեռուստաալիքը նաև հայտնել է, որ անցյալ երկուշաբթի ԱՄՆ ՄԶԳ-ի ավելի քան 50 պրոֆեսիոնալ քաղաքացիական ծառայողներ ուղարկվել են հարկադիր պարապուրդի:

Կոնգրեսն ամեն տարի գումար է հատկացնում ԱՄՆ ՄԶԳ-ին` հիմնականում օտարերկրյա օգնության և միջազգային նշանակության բարեգործական կազմակերպությունների համար: Այս անկախ գործակալության տարեկան բյուջեն կազմում է 42,8 միլիարդ դոլար, ինչը 1,7 տրիլիոն դոլար ընդհանուր դաշնային հայեցողական ծախսերի մի փոքր մասն է:

0 մեկնաբանություն
0

ՆՄԱՆԱՏԻՊ ՀՈԴՎԱԾՆԵՐ