ՀՀ վարչապետ Նիկոլ Փաշինյանը այսօր պատասխանում է ԶԼՄ ներկայացուցիչների և ՀԿ-ների հարցերին։ Անդրադառնալով Արևելյան գործընկերության նիստի շրջանակում Ադրբեջանի նախագահի հետ հանդիպման մասին հարցին՝ Նիկոլ Փաշինյանն ասաց, որ ՀՀ-ն պատրաստ է բարձր և բարձրագույն մակարդակներում ունենալ հանդիպումներ, բանակցություններ ԵԱՀԿ Մինսկի խմբի համանախագահության ֆորմատով։
«Ինչպես գիտեք, արտաքին գործերի նախարարներն այդ ֆորմատում արդեն հանդիպումներ ունեցել են։ Ակնկալում ենք և սպասում ենք, որ նաև ԵԱՀԿ Մինսկի խմբի համանախագահությունը կազմակերպի այդպիսի հանդիպում։ Մենք արդեն նախապես դրա մասին հայտարարել ենք, մեր պատրաստակամություն ենք արտահայտել։
Դեկտեմբերի 15-ի հանդիպումը, ըստ էության, նույնպես նորություն չէ, որովհետև Եվրոպական խորհրդի նախագահ Շառլ Միշելը դեռևս ամռանը տարածաշրջան կատարած իր այցի շրջանակում այդպիսի գաղափար էր առաջ քաշել, ասել էր, որ Արևելյան գործընկերության գագաթնաժողովն է տեղի ունենալու դեկտեմբերի 15-ին, և ինքն այդպիսի գաղափար առաջադրեց, որ կազմակերպի հանդիպում իմ և Ադրբեջանի նախագահի միջև։
Ես այդ գաղափարը չեմ մերժել, ընդունել եմ, ասել եմ, որ դեկտեմբերը կմոտենա, ավելի կկոնկրետացնենք։ Հայտնի հանգամանքներում նա զանգ է ունեցել իմ և Ադրբեջանի նախագահի հետ, և մենք երկուստեք հաստատել ենք մասնակցությունն Արևելյան գործընկերության գագաթնաժողովին և, համապատասխանաբար, դրա շրջանակներում նաև պատրաստակամություն ենք արտահայտել հանդիպել»,- ասաց վարչապետը:
