Ռեջեփ Էրդողանը տևական դադարից հետո կրկին հայտնել է Անկարայի ձգտման մասին՝ անդամակցելու Եվրոպական միությանը: Թուրքիայի նախագահի խոսքով՝ երկիրը պատրաստ է ԵՄ-ին լիիրավ անդամակցությանը, իսկ կազմակերպությունն ունի Թուրքիայի կարիքը:
«Եվրոպական միությանը Թուրքիայի անդամակցության բանակցությունները պետք է ակտիվանան։ Դա պետք է տեղի ունենա արդեն հիմա՝ առանց լրացուցիչ քայլերի։ Երբ Եվրամիութունն այդ հարցին ռազմավարական լուծում տա, նրանց համար որևէ խոչընդոտ չի լինի»,- նշել է Էրդողանը:
Թուրքիան Եվրամիությանն անդամակցելու թեկնածու է արդեն ավելի քան 25 տարի՝ 1999 թվականից։ Դրանից վեց տարի անց սկսված բանակցությունները դադարեցվել էին 2016 թվականին՝ երկրում մարդու իրավունքների և ժողովրդավարության խախտումների վերաբերյալ քաղաքական տարաձայնությունների և քննադատության պատճառով: