Ես համարում եմ, և դա նաև բարձրաձայն եմ ասել, որ եթե ես ինչ-որ պահի պետք է լքեի Ազգային ժողովի նախագահի պաշտոնը, Ռուբեն Ռուբինյանը լավագույն թեկնածուն էր, որ կարող էր ինձ փոխարինել Ազգային ժողովի նախագահի պաշտոնում։ Այս մասին այսօր լրագրողների հետ ճեպազրույցում հայտարարեց ԱԺ նախագահ Ալեն Սիմոնյանը:
«Ես հաջողություն եմ մաղթում նրան։ Նախ՝ ինքը իմ ընկերն է, և ես նրան շարունակում եմ համարել իմ ընկերը։ Շատ ուրախ եմ, որ աշխատել եմ նրա հետ, ինքն իմ գործընկերն է։ Մաղթում եմ, որ նա լինի Ազգային ժողովի երկրորդ նախագահը, որը իր ժամկետը մինչև վերջ կպաշտոնավարի:
Նույնը կարող եմ ասել փոխխոսնակների մասով: Հայկ Կոնջորյանի մասով մասնավորապես, որովհետև այն, ինչ Հայկը պատերազմից հետո կարողացավ անել, ես չէի կարող: Ես ոչ էդ ուժը, ոչ համբերությունը չէի ունենա խմբակցության հետ: Ինքը բալանսավորված է պահել, իսկ ինչ վերաբերում է Վահագն Ալեքսանյանին, իրեն նույնպես հաջողություն եմ մաղթում»,- ասաց ԱԺ նախագահը:
Ավելի վաղ հայտնել էինք, որ «Քաղաքացիական պայմանագիր» կուսակցությունը ԱԺ նախագահի թեկնածու է ընտրել Ռուբեն Ռուբինյանին։ Թեկնածուների թվում էին նաև ԱԺ գործող նախագահ Ալեն Սիմոնյանը և «Քաղաքացիական պայմանագիր» խմբակցության ղեկավար Հայկ Կոնջորյանը։
Հիշեցնենք՝ գաղտնի քվեարկության արդյունքում Ազգային ժողովի նախագահի տեղակալի թեկնածուներ են ընտրվել Հայկ Կոնջորյանը և Վահագն Ալեքսանյանը: