Ես կարծում եմ, որ անհրաժեշտություն կա ՀԷՑ-ում պետական կառավարիչ նշանակելու: Այդ մասին ասաց ԱԺ նախագահ Ալեն Սիմոնյանը՝ պատասխանելով «Քաղաքացիական պայմանագիր» խմբակցության հեղինակած ««Հանրային ծառայությունները կարգավորող մարմնի մասին ՀՀ օրենքում լրացում կատարելու մասին» և «Էներգետիկայի մասին» ՀՀ օրենքում լրացումներ և փոփոխություններ կատարելու մասին»» օրենքների նախագծերի փաթեթի վերաբերյալ հարցին:
«Ես տեղեկություններ ունեմ, չգիտեմ՝ որքանով են հավաստի, որ ներսում մարդկանց ստիպում են մասնակցել տարբեր միջոցառումների, ասել են, որ ամսի 4-ին երթ է լինելու, և պարտադրել են ՀԷՑ-ի աշխատակիցներին, որ մասնակցեն: Պետք է կրկնեմ վարչապետի ասածը ԱԺ-ում. այդ բոլոր մարդիկ, ովքեր նման բան են առաջարկում, նրանք առնվազն գործից ազատվելու են, օրենքը ընդունվելուց հետո կառավարիչ նշանակելու պարագայում նրանք պատասխանատվության են ենթարկվելու»,- նշեց նա:
Հիշեցնենք՝ ՏԿԵ նախարար Դավիթ Խուդաթյանը նշել է, որ ՀԷՑ-ը պետականացնելու անհրաժեշտությունը չի ծագել քաղաքական հայտարարությունից (գործարար, «Տաշիր» ընկերությունների խմբի հիմնադիր Սամվել Կարապետյանի – խմբ.) հետո, այլ՝ դրանից առաջ, հայտնել՝ ՀՀ վարչապետի կողմից գրավոր հանձնարարական է տրվել ՏԿԵ նախարարությանը և իրեն, և տպավորությունն այնպիսին է, որ քաղաքական հայտարարությունն է հաջորդել դրան, այսինքն՝ երբ ՀՀ կառավարությունը նպատակադրվել է որակական փոփոխություն ապահովելու համար միջամտել ՀԷՑ-ում կառավարման այդ համակարգին:
Ըստ նրա՝ հասկանալի է եղել, որ որակական ցուցանիշները՝ մանավանդ անջատումների թվով, խախտված են, և քննարկումները հանգեցրել են նրան, որ ՀԷՑ-ը տարեվերջին առնվազն 12,5 միլիարդ դրամի ակտավորվելու է, դրան գումարած՝ ՀՀ վարչապետը մեկամսյա ժամկետ է տվել՝ քայլեր ձեռնարկելու համար:
Հայտնենք՝ ՀՀ վարչապետ Նիկոլ Փաշինյանը Ֆեյսբուքի էջում հիշեցրել է իր հանձնարարականը ՀԷՑ-ի նկատմամբ հատուցման մեխանիզմներ ներդնելու վերաբերյալ: