Թուրքիայի արտգործնախարար Մևլութ Չավուշօղլուն կարծիք է հայտնել, որ հացահատիկի գործարքի հաջողությունը կարող է վստահության մթնոլորտ ստեղծել Ռուսաստանի և Ուկրաինայի միջև, ինչը կնպաստի կրակի դադարեցմանը և ուկրաինական ճգնաժամի կարգավորմանը:
Նրա խոսքով՝ հացահատիկային գործարքի կնքումը վերացրել է ոչ միայն Ուկրաինայից, այլև Ռուսաստանից հացահատիկի արտահանման արգելքը:
«Մենք հույս ունենք, որ հացահատիկի արտահանումը կիրականացվի առանց խափանումների։ Կարևոր է, որ այն հասցվի այն երկրներին, որոնք դրա կարիքը ունեն. դրան կհետևի Ստամբուլի համակարգող կենտրոնը»,- ասել է Թուրքիայի ԱԳ նախարարը:
Վրաստանի ԱԳ նախարար Իլիա Դարչիաշվիլու հետ բանակցություններից հետո կայացած մամուլի ասուլիսում Չավուշօղլուն հայտարարել է, որ Անկարան պատրաստ է ջանքեր գործադրել հակամարտության լուծման համար, այդ թվում՝ իր տարածքը տրամադրել Մոսկվայի և Կիևի միջև ցանկացած մակարդակով հանդիպումների համար:
