Գյումրիում կեսօրից 《Մայր Հայաստան》 հուշահամալիրի տարածքում հավաքվել են 《Ազգային-Ժողովրդավարական Բևեռ》 շարժման անդամները։
Վերջիններս քայլերթով գնացել են Գյումրիում տեղակայված ռուսական 102-րդ ռազմաբազայի տարածք` փակելով այնտեղ տանող ճանապարհը։ Չհետևելով ոստիկանների հրահանգներին ճանապարհը բացելու` որոշ ժամանակ անց ոստիկանությունը բերման է ենթարկել շարժման մասնակիցներից մի քանիսին։
Այժմ նախաձեռնության մասնակիցները գտնվում են 《Մայր Հայաստանի》 տարածքում` պնդելով, որ շարունակելու են մնալ այստեղ։
Նշենք, որ ռազմաբազայի ճանապարհին հայտարարություններով հանդես եկող անձանց պնդումը հետևյալն է , որ Հայաստանը Արցախին կապող միակ ճանապարհի փակ լինելու հարցում Ռուսաստանը դրսևորում է անգործություն, հետևաբար, ակցիայի մասնակիցների պնդմամբ` առաջնային է Արցախում միջազգային խաղաղապահների ներկայությունը։
