Ներկայում, ցավոք, նկատվում է պարտադիր զինվորական կամ այլընտրանքային ծառայության հայտարարված զորակոչից և վարժական հավաքներից խուսափելու դեպքերի աճ: 2023 թվականի ընթացքում ՔՕ 461 և 462-րդ հոդվածներով նախաձեռնվել է 1499 քրեական վարույթ, իսկ 2024 թվականի ընթացքում՝ 1779 քրեական վարույթ: Սա վկայում է քրեական քաղաքականության վերանայման և հիշյալ արարքները կատարած անձանց նկատմամբ պատժողական ավելի խիստ քաղաքականություն վարելու անհրաժեշտության մասին: ԱԺ մամուլի ծառայության փոխանցմամբ՝ այս մասին ասել է Արդարադատության նախարարի տեղակալ Գևորգ Քոչարյանը ՀՀ ԱԺ պետական-իրավական հարցերի մշտական հանձնաժողովի՝ մայիսի 20-ի նիստում: Առաջին ընթերցմամբ քննարկվել է «ՀՀ քրեական օրենսգրքում փոփոխություններ կատարելու մասին» օրենքի նախագիծը:

Նախագծով առաջարկվում է խստացնել Քրեական օրենսգրքի 461-րդ հոդվածի 1-ին մասով և 462-րդ հոդվածի 1-ին մասով նախատեսված արարքների կատարման համար նախատեսված քրեական պատասխանատվությունը:

Մասնավորապես, առաջարկվում է զինվորական ծառայությունից խուսափելու՝ 461-րդ հոդվածում պատժաչափը՝ 2-5 տարի ժամկետով ազատազրկումը փոխարինել 3-6 տարի ժամկետով ազատազրկման: Վարժական հավաքներից խուսափելու՝ 462-րդ հոդվածում առաջարկվում է «սանկցիայի տուգանք» պատժատեսակի չափն ամսական եկամտի նկատմամբ հաշվարկվող առավելագույնը ,քսանապատիկի չափովե բառերը փոխարինել «տասնհինգապատիկից երեսնապատիկի չափով», իսկ ազատազրկման համար նախատեսված առավելագույնը «երկու տարի ժամկետը» փոխարինել «մեկից երեք տարի ժամկետով» բառերով: «Գտնում ենք, որ նման փոփոխությունները կարող են նպաստել պարտադիր զինվորական կամ այլընտրանքային ծառայության հայտարարված զորակոչից և վարժական հավաքներից խուսափելու դեպքերի նվազմանը»,- նշել է Գևորգ Քոչարյանը:

Հիմնական զեկուցողը պատասխանել է պատգամավորների հարցերին՝ ներկայացնելով մանրամասներ առաջարկվող կարգավորումների վերաբերյալ:

Ելույթներում պատգամավորներն անդրադարձել են պարտադիր զինվորական ծառայությունից, վարժական հավաքներից զարտուղի ճանապարհներով խուսափելուն վերաբերող խնդիրներին, հարցի հասարակական վերահսկողությանը:

Եզրափակիչ ելույթում ՀՀ արդարադատության նախարարի տեղակալն անդրադարձել է պատգամավորների կողմից բարձրացված հարցադրումներին ու դիտարկումներին:

Նախագիծն արժանացել է դրական եզրակացության:

Հաջորդիվ քննարկվել է պատգամավորներ Հովիկ Աղազարյանի և Հակոբ Ասլանյանի հեղինակած «ՀՀ ընտրական օրենսգրքում փոփոխություն կատարելու մասին» օրենքի նախագիծը: Ըստ առաջարկվող փոփոխության՝ քվեախցիկը պետք է տեղադրվի այնպես, որ ընտրողը քվեարկության պահին լինի թիկունքով դեպի հանձնաժողովը: «Ազգային ժողովի կանոնակարգ» սահմանադրական օրենքի 66-րդ հոդվածի 4-րդ մասի 4-րդ կետի համաձայն՝ հեղինակը հետ է կանչել նախագիծը: