Հիփոթեքային վարկ մարող ընտանիքում երեխա ծնվելու դեպքում պետությունը միանվագ գումար է ուղղում վարկի մնացորդային մայր գումարի մարմանը։ Սակայն եթե բնակելի գույքը գտնվում է սահմանամերձ կամ առանձին գյուղական բնակավայրում, աջակցությունն ավելանում է 50 տոկոսով։ Նույն կանոնը գործում է նաև մարզերում բնակարան ձեռք բերելու աջակցության մասով։
Ինչպես տեղեկացնում է Iravaban.net-ը, կարգավորումը սահմանված է Կառավարության 2020 թվականի մայիսի 14-ի N 968-Լ որոշմամբ, իսկ սահմանամերձ բնակավայրերի ցանկը՝ Կառավարության 2014 թվականի դեկտեմբերի 18-ի N 1444-Ն որոշմամբ։
Ի՞նչ է սահմանում որոշումը 50 տոկոս հավելման մասին
N 968-Լ որոշման N 1 հավելվածի 19-րդ կետով, եթե շահառուն հիփոթեքային վարկով բնակելի անշարժ գույքը ձեռք է բերել կամ անհատական բնակելի տունը կառուցել կամ կառուցում է սահմանամերձ կամ առանձին բնակավայրում, հիփոթեքի մարման աջակցությունն ավելացվում է 50 տոկոսով։
Նույն հավելվածի 13-րդ կետով նույն բնակավայրերի դեպքում 50 տոկոսով ավելացվում է նաև մարզերում հիփոթեքի աջակցությունը։
Որքա՞ն են բազային չափերը
17-րդ կետով հիփոթեքի մարման աջակցության չափը կազմում է դիմելու օրվա դրությամբ՝ վարկի մնացորդային մայր գումարի 10 տոկոսը, բայց ոչ ավելի, քան 500 000 դրամ, իսկ Երևանում՝ 5 տոկոսը, բայց ոչ ավելի, քան 500 000 դրամ, եթե նոր ծնված երեխան առաջին կամ երկրորդն է։
Եթե երեխան երրորդն է կամ հաջորդը՝ մնացորդային մայր գումարի 50 տոկոսը, բայց ոչ ավելի, քան 2 միլիոն դրամ, իսկ Երևանում՝ 25 տոկոսը, բայց ոչ ավելի, քան 2 միլիոն դրամ։
Մարզերում հիփոթեքի աջակցության չափը 12-րդ կետով կազմում է բնակարանի արժեքի 5 տոկոսը, բայց ոչ ավելի, քան 1 միլիոն դրամ, որին ավելանում է երրորդ և հաջորդ յուրաքանչյուր երեխայի համար ևս 5 տոկոս՝ բայց ոչ ավելի, քան 500 000 դրամ։ Տուն կառուցելու դեպքում՝ վարկի 10 տոկոսը նույն սահմանաչափերով։ 13-րդ կետով այդ աջակցության առավելագույն չափը 2 միլիոն դրամ է։
Կոնկրետ գումարը յուրաքանչյուր դեպքում հաշվարկվում է դիմելու օրվա դրությամբ՝ վարկ տրամադրած կազմակերպության միջոցով։
Ո՞ր բնակավայրերն են ընդգրկված առանձին գյուղական բնակավայրերի ցանկում
N 968-Լ որոշման N 2 հավելվածով ցանկը ներառում է 28 համայնքի 48 բնակավայր։
Արագածոտնի մարզ՝ Արագած համայնքի Ալագյազ, Թալին համայնքի Գառնահովիտ և Լուսակն։
Արարատի մարզ՝ Արալեզ համայնքի Արալեզ, Արտաշատ համայնքի Բարձրաշեն և Դեղձուտ։
Արմավիրի մարզ՝ Արաքս համայնքի Արտիմետ, Արմավիր համայնքի Այգեվան, Լենուղի, Նորավան և Սարդարապատ, Բաղրամյան համայնքի Արգինա, Խոյ համայնքի Արագած և Շահումյան, Մեծամոր համայնքի Արմավիր, Արևիկ, Գետաշեն, Փշատավան և Ջանֆիդա։
Գեղարքունիքի մարզ՝ Ճամբարակ համայնքի Ջիլ, Մարտունի համայնքի Աստղաձոր, Լեռնահովիտ, Ներքին Գետաշեն և Վերին Գետաշեն, Սևան համայնքի Գագարին, Վարդենիս համայնքի Ակունք և Շատջրեք։
Լոռու մարզ՝ Ալավերդի համայնքի Հագվի, Լոռի Բերդ համայնքի Ագարակ, Սպիտակ համայնքի Գոգարան, Լեռնավան և Լուսաղբյուր, Ստեփանավան համայնքի Վարդաբլուր, Տաշիր համայնքի Մեդովկա։
Կոտայքի մարզ՝ Աբովյան համայնքի Կաթնաղբյուր, Հրազդան համայնքի Ջրառատ։
Շիրակի մարզ՝ Ախուրյան համայնքի Կապս, Ամասիա համայնքի Արեգնադեմ և Բերդաշեն, Արթիկ համայնքի Արևշատ։
Վայոց ձորի մարզ՝ Եղեգնաձոր համայնքի Շատին, Եղեգիս և Չիվա, Վայք համայնքի Գոմք։
Տավուշի մարզ՝ Այրում համայնքի Բագրատաշեն։
Սյունիքի մարզ՝ Գորիս համայնքի Հարժիս, Սիսիան համայնքի Դարբաս և Վաղատին։
Ո՞ր բնակավայրերն են սահմանամերձ
N 1444-Ն որոշման N 1 հավելվածով ցանկը ներառում է 13 համայնքի 82 բնակավայր։
Արարատի մարզ՝ Արարատ համայնքի Երասխ, Պարույր Սևակ և Տիգրանաշեն։
Գեղարքունիքի մարզ՝ Ճամբարակ համայնքի Ճամբարակ քաղաքը և Վահան գյուղը, Վարդենիս համայնքի Ազատ, Կութ, Ներքին Շորժա, Նորաբակ, Սոթք և Վերին Շորժա։
Սյունիքի մարզ՝ Գորիս համայնքի Աղբուլաղ, Բարձրավան, Խնձորեսկ, Հարթաշեն, Ձորակ, Ներքին Խնձորեսկ, Շուռնուխ, Որոտան, Վանանդ և Քարահունջ, Կապան համայնքի Ագարակ, Բարգուշատ, Գեղանուշ, Գոմարան, Դավիթ Բեկ, Դիցմայրի, Եղվարդ, Խդրանց, Խորձոր, Ծավ, Կաղնուտ, Ճակատեն, Ներքին Հանդ, Շիկահող, Սզնակ, Սյունիք, Սրաշեն, Վարդավանք և Ուժանիս, Մեղրի համայնքի Նռնաձոր, Տաթև համայնքի Խոտ, Տեղ համայնքի Արավուս, Խնածախ, Խոզնավար, Կոռնիձոր, Վաղատուր, Տեղ և Քարաշեն։
Վայոց ձորի մարզ՝ Արենի համայնքի Արենի և Խաչիկ, Վայք համայնքի Բարձրունի, Խնձորուտ, Նոր Ազնաբերդ և Սերս։
Տավուշի մարզ՝ Բերդ համայնքի Այգեձոր, Այգեպար, Արծվաբերդ, Մովսես, Ներքին կարմիր աղբյուր, Չինարի, Չորաթան, Պառավաքար և Վերին կարմիր աղբյուր, Նոյեմբերյան համայնքի Նոյեմբերյան քաղաքը, Բաղանիս, Բարեկամավան, Բերդավան, Դովեղ, Կոթի, Կողբ, Ոսկեպար և Ոսկեվան, Իջևան համայնքի Ազատամուտ, Այգեհովիտ, Բերքաբեր, Ծաղկավան, Կայան, Կիրանց, Սարիգյուղ, Սևքար և Վազաշեն։
Ի՞նչ պայմաններ պետք է պահպանվեն
Հավելումն առանձին ծրագիր չէ, ուստի պահպանվում են հիմնական պայմանները։
Հիփոթեքի մարման աջակցության դեպքում 16-րդ կետով դիմումը ներկայացվում է մինչև երեխայի 1 տարին լրանալը ներառյալ, գույքի գինը կամ գնահատված շուկայական արժեքը չպետք է գերազանցի 35 միլիոն դրամը, որն ավելանում է երրորդ և հաջորդ յուրաքանչյուր երեխայի հաշվով 5 միլիոն դրամով, դիմելու օրվա դրությամբ շահառուն պետք է առնվազն 12 ամիս կատարած լինի վարկի մարումներ, իսկ վերջին 12 ամսում ուշացած օրերի ընդհանուր քանակը չպետք է գերազանցի 30 օրացուցային օրը, և գույքը պետք է լինի ընտանիքի միակ բնակելի անշարժ գույքը։
Մարզերում հիփոթեքի աջակցության դեպքում 11-րդ կետով պահանջվում է առնվազն երկու անչափահաս երեխա, գույքը պետք է ձեռք բերված լինի կամ վարկը տրամադրված լինի 2024 թվականի հունվարի 1-ին կամ դրանից հետո, կանխավճարի նվազագույն չափը երկրորդային շուկայից գնելիս 10 տոկոս է, առաջնայինից՝ 7,5 տոկոս, իսկ 10-րդ կետով այդ աջակցությունից կարելի է օգտվել մեկ անգամ։
Երկու դեպքում էլ վարկի գործողության ընթացքում գույքն օտարելիս պետական աջակցության գումարը ենթակա է վերադարձման պետությանը։
Հաշվվո՞ւմ են մեծ երեխաները
Այո։ 20-րդ կետով հիփոթեքի մարման աջակցության դեպքում երեխաների թվում հաշվի են առնվում նաև շահառուի չափահաս զավակները։
Մինչև ե՞րբ է գործում ծրագիրը
N 968-Լ որոշմամբ հաստատված ծրագրերը նախատեսված են 2024-2026 թվականների համար։
Ամփոփում
Ամփոփելով՝ սահմանամերձ և առանձին գյուղական բնակավայրերում ինչպես հիփոթեքի մարման, այնպես էլ մարզերում հիփոթեքի աջակցությունն ավելացվում է 50 տոկոսով, ցանկերում ընդգրկված են ընդհանուր առմամբ 130 բնակավայր՝ 48 առանձին գյուղական և 82 սահմանամերձ, բազային չափերը կազմում են մինչև 500 000 դրամ առաջին և երկրորդ երեխայի, մինչև 2 միլիոն դրամ երրորդ և հաջորդ երեխայի դեպքում, մարզերում բնակարան ձեռք բերելու աջակցության առավելագույն չափը 2 միլիոն դրամ է, դիմելու ժամկետը՝ մինչև երեխայի 1 տարին լրանալը, իսկ կոնկրետ գումարը հաշվարկվում է վարկ տրամադրած կազմակերպության միջոցով, – տեղեկացնում է Iravaban.net-ը։
Ծանուցում. սույն նյութը պատրաստված է միայն իրավական իրազեկման նպատակով և չի հանդիսանում իրավաբանական խորհրդատվություն։