«Սպուտնիկ Ադրբեջանի» գլխավոր խմբագիր Եվգենի Բելոուսովը կալանքից ազատ արձակվելուց հետո լքել է Բաքուն՝ հայտնել է Ռուսաստանի արտաքին գործերի նախարարության մամուլի խոսնակ Մարիա Զախարովան։
Հունիսի 30-ին Ադրբեջանում ձերբակալել էին «Սպուտնիկ Ադրբեջան» գործակալության յոթ աշխատակցի, երբ Ռուսաստանում ուժայնինները մի շարք ադրբեջանցիների էին բերման ենթարկել, նրանցից մեկը մահացել էր: Ստեղծված իրավիճակի ֆոնին Ռուսաստանի և Ադրբեջանի հարաբերությունները լարվել էին:
Ավելի ուշ՝ հոկտեմբերի 9-ին, Տաջիկստանում՝ ԱՊՀ գագաթնաժողովի շրջանակում, տեղի է ունեցել Վլադիմիր Պուտինի և Իլհամ Ալիևի հանդիպումը: Կողմերն անդրադարձել են 2024 թվականի դեկտեմբերին Ղազախստանում «Ադրբեջանական ավիաուղիների»՝ Բաքվից Գրոզնի մեկնող ինքնաթիռի վթարին, նաև երկու երկրում ձերբակալված իրենց քաղաքացիների հարցին: Նախագահների հանդիպումից հետո ազատ է արձակվել Բաքվում ավելի վաղ ձերբակալված «Սպուտնիկ Ադրբեջան»-ի գործադիր տնօրեն Իգոր Կարտավիխը: Մոսկվան էլ ազատ է արձակել Ռուսաստանում ձերբակալված Ադրբեջանի քաղաքացիներից մեկին։