Ռուսաստանի Դաշնության արտգործնախարարությունը հերքել է Դուբլինի ՌԴ դեսպանատան տարածքում լրտեսական բազա կառուցելու մասին իռլանդական լրատվամիջոցներում տարածված տեղեկությունները, հայտնում է «ՌԻԱ Նովոստի» լրատվական գործակալությունը։
Ավելի վաղ մամուլում տեղեկություններ էին տարածվել այն մասին, որ Ռուսաստանը, իբր, լրտեսական բազա է կառուցում Իռլանդիայում դեսպանատան տարածքում:
ՌԴ արտգործնախարարությունը նշել է․ «Իռլանդիայում Ռուսաստանի դիվանագիտական առաքելության շենքերի և շինությունների համալիրի վերակառուցումը պայմանավորված է այն պայմանների բարելավման անհրաժեշտությամբ, որում աշխատում են մեր դիվանագետները» և հավելել, – «Ավելի քան մեկ դար առաջ կառուցված բնակելի փոքրիկ առանձնատունը, որի տարածքում այժմ գտնվում է դեսպանատունը, այլևս ի վիճակի չէ ապահովել դիվանագիտական առաքելության բնականոն գործունեությունը»:
Նախարարությունից նշել են, որ Իռլանդիայի իշխանությունների հետ շինարարական փաստաթղթերի հաստատման գործընթացը տևել է մի քանի տարի, և նախագծի մանրամասները ոչ ոքի համար գաղտնիք չեն եղել: Ավելին, աշխատանքի մեկնարկից հետո Իռլանդիայի ԱԳՆ և տեղական լրատվամիջոցների ներկայացուցիչները հնարավորություն են ունեցել հաստատություն այցելել և ամեն ինչ իրենց աչքերով տեսնել:
ՌԴ ԱԳՆ–ից նշել են, որ Իռլանդիայում դեռևս ազդեցիկ են այն ուժերը, որոնք կողմնակի ազդեցությունների են ենթարկվում և շեշտել․ «Հուսով ենք, որ Իռլանդիայի ղեկավարությունը կշարունակի ինքնուրույն և զգուշորեն մոտենալ Ռուսաստանի հետ երկկողմ հարաբերությունների զարգացմանը՝ համաձայն իրենց առաջնահերթությունների, և ոչ թե դուր գալ նախկին մայրաքաղաքին, որը, ինչպես կարելի է դատել, դեռ ձգտում է ստորադասել Դուբլինի քաղաքականությունն իր շահերին»։