ԱՄՆ նախագահ Դոնալդ Թրամփը հայտարարել է, որ Ադրբեջանի և Հայաստանի միջև խաղաղության ձեռքբերումից հետո Ռուսաստանի նախագահ Վլադիմիր Պուտինը զանգահարել է իրեն։
«Պուտինը զանգահարել է ինձ և ասել, որ դա զարմանալի է, պարզապես անհավանական։ Մենք չէինք կարողանում կանգնեցնել այդ պատերազմը երկար տարիներ»,- ասել է Թրամփը և նշել, որ իրեն դա հաջողվել է: Հայտարարությունը Թրամփն արել է լրագրողների հետ հանդիպմանը՝ մեկնաբանելով Ադրբեջանի և Հայաստանի միջև հարաբերությունների կարգավորումը։
Թրամփն ընդգծել է, որ խաղաղություն է ձեռք բերվել Սպիտակ տանը Ադրբեջանի և Հայաստանի ղեկավարների հանդիպումից հետո: Նրա խոսքով՝ հանդիպման ժամանակ սկզբում ղեկավարները հեռավորություն են պահպանել, բայց «աստիճանաբար մտերմացել են և խաղաղություն կնքել»:
Օգոստոսի 8-ին Վաշինգտոնում՝ Սպիտակ տանը, ստորագրվել է Ադրբեջանի Հանրապետության նախագահի, Հայաստանի Հանրապետության վարչապետի և Ամերիկայի Միացյալ Նահանգների նախագահ Դոնալդ Թրամփի համատեղ Հռչակագիրը: Վաշինգտոնում Հայաստանի ԱԳ նախարար Արարատ Միրզոյանը և Ադրբեջանի ԱԳ նախարար Ջեյհուն Բայրամովը Հայաստանի, Ադրբեջանի և ԱՄՆ ղեկավարների ներկայությամբ նախաստորագրել էին «Հայաստանի Հանրապետության և Ադրբեջանի Հանրապետության միջև խաղաղության և միջպետական հարաբերությունների հաստատման մասին» համաձայնագիրը։