Կոռուպցիայի հետ մեր չհաշտվելն օգտագործվում է մեր դեմ: Հայաստանում նման բան չի եղել, որ գործող նախարարը որպես մեղադրյալ ներգրավվի, որ Քաղաքաշինության կոմիտեի գործող ղեկավարը ձերբակալվի կաշառքով, էլ չեմ ասում՝ ուրիշ բարձրաստիճան պաշտոնյաներ: Այդ մասին Ժողովրդավարության հայկական ֆորումի շրջանակում կազմակերպված պանելային քննարկման ժամանակ ասաց վարչապետ Նիկոլ Փաշինյանը՝ միաժամանակ հիշեցնելով անմեղության կանխավարկածի մասին:
«Չի կարելի կոռուպցիայի դեմ պայքարն օգտագործել մեր դեմ. դա անազնիվ բան է: Էլ չեմ ասում, որ չի կարելի երկու վերնագրով մարդկանց կախաղաններ ենք հանում հրապարակումներում: Տենց ո՞նց կլինի: Բա դա ժողովրդավարությո՞ւն է, ժողովրդավարությունն այդպե՞ս է»,- ասաց նա:
Փաշինյանը նաև պաշտոնապես հայտարարեց, որ 2018-ից Հայաստանում համակարգային կոռուպցիան վերացել է և մինչև այսօր չկա:
«Եթե համակարգային կոռուպցիա լիներ, այդ ձեր իմացած բոլոր կոռուպցիոն դեպքերից ես իմ փայը պետք է ունենայի: Ես չեմ կարող ձեզ հարցնել՝ ունե՞մ փայ, թե՞ չունեմ, որովհետև ես գիտեմ՝ ունե՞մ փայ, թե՞ չունեմ: Եվ ես ձեզ ասում եմ՝ չկա, չի եղել և չի լինելու համակարգային կոռուպցիա Հայաստանում:
Իսկ կոռուպցիա, կոռուպցիոն ինչ-որ դրսևորումներ, ցավոք, աշխարհի շատ երկրներում կան: Գնումների համակարգը ինչքան էլ լավարկում ենք, անընդհատ պրոբլեմներ են ի հայտ գալիս»,- ասաց նա: