Իրանի Իսլամական Հանրապետությունն աջակցում է ցանկացած գործընթացի, որը հանգեցնում է բախումների դադարեցմանը, լարվածության նվազեցմանը և ամուր կայունության հաստատմանը՝ հայտարարել է Իրանի կառավարության խոսնակ Ֆաթեմե Մոհաջերանին:
Նրա խոսքով՝ այդ աջակցությունը հիմնված է տարածաշրջանի երկրների համաձայնեցրած սկզբունքների վրա: Պաշտոնյան ընդգծել է Թեհրանի երեք անսասան սկզբունքները՝ իրենց տարածքի նկատմամբ երկրների լիակատար ինքնիշխանության պահպանումը, բոլոր պետությունների տարածքային ամբողջականության պաշտպանությունը և միջազգային սահմանների ցանկացած փոփոխության վճռական հակազդեցությունը, հավելել՝ Բաքվի և Երևանի վերջին համատեղ հայտարարության մեջ այդ սկզբունքները հաշվի են առնվել:
Մոհաջերանին ընդգծել է, որ տեղի ունեցած առանցքային փոփոխություններից մեկը «Զանգեզուրի միջանցք» կոչված վիճահարույց ծրագրի չեղարկումն էր:
«Ըստ կողմերի՝ միջանցքի հարցը հանվել է օրակարգից և փոխարինվել տարանցիկ ճանապարհով՝ Հայաստանի լիակատար ինքնիշխանության ներքո»,- Mehr գործակալության փոխանցմամբ՝ նշել է Մոհաջերանին իր հոդվածում:
Նա հերթական անգամ հիշեցրել է Իրանի դիրքորոշումը, որ արտատարածաշրջանային դերակատարների միջամտությունը կարող է երկարաժամկետ բացասական հետևանքներ ունենալ խաղաղության ու կայունության համար: