ՄԱԿ-ի գլխավոր քարտուղար Անտոնիո Գուտերեշը ողջունում է ուղղափառ Սուրբ Ծննդյան տոներին Ուկրաինայում՝ շփման գծի ողջ երկայնքով, Ռուսաստանի հայտարարած հրադադարի ռեժիմը, ասել է գլխավոր քարտուղարի խոսնակ Ստեֆան Դյուժարիկը։
«Սուրբ Ծնունդը սուրբ ժամանակ է ինչպես ռուսների, այնպես էլ ուկրաինացիների համար: Գլխավոր քարտուղարը ողջունում է հնարավորությունը, որ այս սուրբ ժամանակ կդադարեցվեն բոլոր ռազմական գործողությունները»,- ասել է Դյուժարիկը մամուլի ճեպազրույցի ժամանակ:
Նա նաև վստահեցրել է, որ ՄԱԿ-ը պատրաստ է օգնել դադարեցնելու հակամարտությունն Ուկրաինայում։
Ավելի վաղ ՌԴ նախագահ Վլադիմիր Պուտինը որոշում էր կայացրել հրադադարի մասին Սուրբ Ծննդյան տոներին։ Այն կգործի հունվարի 6-ից Մոսկվայի ժամանակով ժամը 12:00-ից մինչև հունվարի 7-ը՝ ժամը 24:00-ը: