Ուխտայում նավթավերամշակման գործարանում խոշոր հրդեհ է բռնկվել, որի հետևանքով կան զոհեր և վիրավորներ
Այս մասին հայտնել է տարածաշրջանային քննչական վարչությունը «Տելեգրամ»-ի իր ալիքում։
«Հետաքննության տվյալներով՝ այսօր Ուխտա քաղաքի նավթավերամշակման գործարանում կապալառուի պլանային տեխնիկական աշխատանքների ժամանակ հրդեհ է բռնկվել, ինչի հետևանքով կան զոհեր և վիրավորներ»,- ասվում է հրապարակման մեջ։
Քննիչները քրեական գործ են հարուցել «Վտանգավոր արտադրական օբյեկտների արտադրական անվտանգության պահանջները խախտելը, որն անզգուշությամբ հանգեցրել է երկու կամ ավելի անձանց մահվան» հոդվածով։ Դա կարող է հանգեցնել մինչև յոթ տարվա ազատազրկման:
Մահացածների թիվը չի նշվում։
Ինչպես հայտնել է Կոմիի ղեկավար Վլադիմիր Ույբան, Ուխտայից չորս կիլոմետր հեռավորության վրա գտնվող նավթավերամշակման գործարանում մազութի բաք է բռնկվել։ Հրդեհի պատճառը, ըստ նախնական տեղեկությունների, անվտանգության կանոնների չպահպանումն է։ Ույբան ընդգծել է, որ միջադեպը կապված չէ անօդաչու թռչող սարքի հարձակման հետ։
Ռուսաստանի Արտակարգ իրավիճակների նախարարության Կոմիի գլխավոր վարչությունը հայտնել է, որ վիրավորվել է երեք աշխատակից։