ԿԽՄԿ-ն հայտարարում է՝ հնարավորինս շուտ կայցելեն Վագիֆ Խաչատրյանին։ Այդ մասին ասված է միջազգային կազմակերպության Թվիթերի միկրոբլոգում։
«Բուժառուների տեղափոխումը կարևոր նշանակություն ունի խոցելի բնակչության համար: Մենք կապի մեջ ենք Վագիֆ Խաչատրյանի ընտանիքի հետ։ Կոչ ենք անում բոլոր շահագրգիռ որոշում կայացնողներին հարգել մեր խիստ մարդասիրական առաքելությունը»,- նշված է գրառման մեջ։
Դրան նախորդող գրառմամբ ԿԽՄԿ-ն հայտնել էր, որ Վագիֆ Խաչատրյանը «ձերբակալվել է»։
Կառույցից հիշեցնում են, որ 2022 թվականի դեկտեմբերից ի վեր միջազգայնորեն ճանաչված մարդասիրական մանդատի շրջանակներում Լաչինի միջանցքով ավելի քան 680 հիվանդներ են տեղափոխել։ «Մենք աշխատում ենք թափանցիկ, մեր գործողությունները համակարգում ենք կողմերի հետ և գործում ենք բացառապես նրանց համաձայնությամբ։ Այսօր ևս այդպես էր»,- հայտարարել են ԿԽՄԿ-ից։