ՀՀ տարածքում անցկացվելու է ՀԱՊԿ խաղաղապահ զորախմբերի «Անխախտ եղբայրություն-2023» համատեղ զորավարժությունը: «Արմենպրես»-ի հաղորդմամբ՝ այս մասին տեղեկացնում է ՌԴ պաշտպանության նախարարության կայքը:
«Ռուսաստանի Դաշնության սահմաններից դուրս Հայաստանի տարածքում կանցկացվի ՀԱՊԿ խաղաղապահ զորակազմերի «Անխախտ եղբայրություն-2023» համատեղ զորավարժություն»,- նշվում Է մամուլի հաղորդագրության մեջ:
Գերատեսչությունը նաև հայտնում է, որ Ռուսաստանի Դաշնության ռազմական օկրուգների զորավարժարաններում նախատեսված է 8 երկկողմ զորավարժություն։
Աղբյուրի համաձայն՝ զորավարժությունների ընթացքում կկատարելագործվեն ռազմական գործողությունների համատեղ պլանավորման հարցերը, մասնակից երկրների ցամաքային զորքերի շտաբների ներկայացուցիչների և ստորաբաժանումների փոխգործակցության կարգը, ինչպես նաև պայմանական անօրինական զինված կազմավորումների չեզոքացման մարտավարական գործողություններ:
Բոլոր զորաշարժերը կրելու են խաղաղապահ և հակաահաբեկչական ուղղվածություն։