ԱՊՀ պետությունների ղեկավարների նեղ ձևաչափով հանդիպմանը բովանդակալից զրույց է տեղի ունեցել Հարավային Կովկասում շուտափույթ խաղաղ կարգավորման հարցերի շուրջ։
«Արմենպրես»-ի հաղորդմամբ՝ լրագրողների հետ ճեպազրույցում այս մասին հայտարարել է ԱՊՀ գլխավոր քարտուղար Սերգեյ Լեբեդևը։
Նրա խոսքով՝ ԱՊՀ պետությունների բոլոր ղեկավարները Հայաստանի վարչապետ Նիկոլ Փաշինյանին և Ադրբեջանի նախագահ Իլհամ Ալիևին մաղթել են հնարավորինս շուտ փոխհամաձայնության գալ:
«Ուրախացրեց այն, որ Հայաստանի և Ադրբեջանի ղեկավարներն իրենք բավականին լավատեսական կանխատեսումներ հայտնեցին, որ արագ կարգավորման իրենց պատրաստակամության շնորհիվ խաղաղության պայմանագիրը երկար սպասել չի տա։ Ոչ ոք, իհարկե, կոնկրետ ժամկետներ չի նշել։ Դուք հասկանում եք, որ այս գործը բարդ է, բայց բոլորը նիստին հույս հայտնեցին, որ խաղաղ գործընթացը մոտ ապագայում ավարտին կհասցվի»,- ասել է Լեբեդևը։
Նիկոլ Փաշինյանը՝ ԱՊՀ ղեկավարների խորհրդի նիստում ՀՀ վարչապետ Նիկոլ Փաշինյանը տեղեկացրել է Հայաստանի Հանրապետության և Ադրբեջանի միջև խաղաղության գործընթացում առկա իրավիճակի և հետագա զարգացման շուրջ Երևանի տեսլականի մասին։ Մանրամասն ներկայացնելով բոլոր քայլերը, Փաշինյանը ընդգծել է.
«Մենք պատրաստ ենք ստորագրել Խաղաղության համաձայնագիրն այս ամիս և սա մեր պաշտոնական դիրքորոշումն է»։
Նիստից հետո լրագրողի հարցին, թե երբ կստորագրեն խաղաղության համաձայնագիրը, Ադրբեջանի նախագահն Իլհամ Ալիևը պատասխանել է՝ «Երբ ամեն ինչ համաձայնեցնենք»։