Մոսկվայում ձերբակալել են հայազգի գործարարի սպանության համար կասկածվող ենթադրյալ մարդասպանին: Այս մասին Lenta.ru-ին հայտնել է Ռուսաստանի Քննչական կոմիտեի մայրաքաղաքի գլխավոր քննչական կոմիտեի ղեկավարի ավագ օգնական Յուլիա Իվանովան։
Նա հայտնել է, որ Մոսկվայի Քննչական կոմիտեի քննիչների և Մոսկվայի քրեական հետախուզության գլխավոր վարչության աշխատակիցների համատեղ աշխատանքի արդյունքում հնարավորինս արագ պարզվել է կասկածյալի ինքնությունը։ Պարզվել է, որ նա 1998 թվականին ծնված տղամարդ է։ Նրա գտնվելու վայրը պարզելուց հետո իրավապահները նրան ձերբակալել են։
Առաջիկայում ենթադրյալ մարդասպանին կտեղափոխեն բաժնի ստորաբաժանում՝ քննչական գործողությունների համար։
Լույս հունիսի 3-ը հաղորդվել է Կոմսոմոլսկի պողոտայում 62-ամյա գործարար Հովհաննես Քամարյանի սպանության մասին։ Մարդասպանը սպասել է, որ զոհը դուրս գա ռեստորանից, կրակել է նրա մեջքին, ապա վերջում կրակել գլխին։ Դրանից հետո հանցագործը հանել է հեռախոսը, լուսանկարել զոհին ու դիմել փախուստի։
Ըստ մամուլի հրապարակումների՝ Քամարյանը հետախուզման մեջ է եղել Հայաստանում. 2013 թվականին նա փորձել է կազմակերպել իր հակառակորդ և քրեական հեղինակություն Դեդ Խասանի համախոհ Ռաֆիկ Մադոյանի սպանությունը, սակայն ոստիկաններին հաջողվել է կանխել հանցագործությունը։