Դեկտեմբերի 10-ին Մոսկվայում տեղի է ունեցել «3+3» տարածաշրջանային խորհրդատվական հարթակի առաջին հանդիպումը՝ Ռուսաստանի, Հայաստանի, Ադրբեջանի, Թուրքիայի փոխարտգործնախարարներ Անդրեյ Ռուդենկոյի, Վահե Գևորգյանի, Խալաֆ Խալաֆովի, Սեդաթ Օնալի, ինչպես նաև Իրանի արտգործնախարարության գլխավոր տնօրեն Ալիռեզա Հաղիղյանի մասնակցությամբ: Վրաստանի ներկայացուցիչները, որոնք նույնպես հրավիրված էին, ձեռնպահ են մնացել հանդիպմանը մասնակցելուց։
Հանդիպման ընթացքում քննարկվել են տարածաշրջանային բազմակողմ համագործակցության զարգացման հեռանկարները։ Պայմանավորվածություն է ձեռք բերվել հարթակի աշխատանքը կենտրոնացնել բոլոր մասնակիցներին հետաքրքրող գործնական հարցերի ուղղությամբ։ Դրանք ներառում են վստահության բարձրացման, առևտրի, տնտեսական, տրանսպորտային, մշակութային և հումանիտար ոլորտներում փոխգործակցության, ինչպես նաև ընդհանուր մարտահրավերներին ու սպառնալիքներին դիմակայելուն ուղղված միջոցառումներ:
Հինգ երկրի ներկայացուցիչները հետաքրքրվածություն են ցուցաբերել հարթակի աշխատանքներին Վրաստանի մասնակցության նկատմամբ, ինչի համար «դուռը մնում է բաց»։
Քննարկվել են հետագա քայլերն ու աշխատանքային ծրագրերը՝ համապատասխան նախարարությունների և գերատեսչությունների հնարավոր ներգրավմամբ։