Էջմիածին, Ոսկեհատ, Գեղակերտ, Աղավնատուն, Ամբերդ, Այգեշատ, Արագած, Արշալույս, Դաշտ, Դողս, Լեռնամերձ, Ծաղկալանջ, Ծաղկունք, Ծիածան, Հայթաղ, Հովտամեջ, Մոնթեավան, Մրգաստան և Շահումյան բնակավայրերի հարգելի՛ բնակիչներ, ընդդիմությունը աղմկում է այս օրերին այնպես, ինչպես 2021 թվականի միավորման հերթական փուլի ընթացքում, որովհետև իրենք վախենում են և մտահոգված են այն վերաբերմունքից, որ դուք տեսնում եք կատարված աշխատանքի նկատմամբ: Այդ մասին Ազգային ժողովում Վաղարշապատ համայնքային փունջ ստեղծելու նախագծի երկրորդ ընթերցման եզրափակիչ ելույթի ժամանակ հայտարարեց ՏԿԵ նախարար Դավիթ Խուդաթյանը՝ անդրադառնալով ընդդիմության՝ նախագծին առնչվող քննադատություններին:
Նախարարը հիշեցրեց, որ 2021-ին՝ համայնքների միավորումից հետո, նույն այդ համայնքներում համապետական ֆինանսավորման ծրագրի շրջանակներում ձևավորվել են ավելի քան 200 մլրդ դրամի կարողություններ:
«Նրանք հասկանում են, որ միավորվելու պարագայում Վաղարշապատ և Խոյ համայնքներում ավելի մեծ ծավալի աշխատանք է հնարավոր իրականացնել հաջորդ տարիների ընթացքում, քան իրականացվել է նախորդիվ, և ամենակարևորը՝ նրանք վախենում են ձեր վերաբերմունքից մեր թեկնածու պարոն Մեխակյանի հանդեպ, որովհետև՝ ով-ով, բայց Էջմիածնի և Խոյի բնակիչները տեսել են պարոն Մեխակյանի աշխատանքը: Էջմիածնում տեսել են որպես համայնքի ղեկավարի տեղակալ, Խոյում տեսել են որպես համայնքի ղեկավար, և հիմա էլ կարող են տեսնել այդ աշխատանքը՝ որպես Արմավիրի մարզպետի: Սա է թաքնված աղմուկի հիմքում:
Երբ մենք չէինք հայտարարել մեր թեկնածուի մասին, այս պրոցեսի շուրջ որևէ լարվածություն չկար, որովհետև ընդդիմությունը մտածում էր՝ մենք թեկնածուի փնտրտուքի մեջ ենք և չենք կարողանալու մրցունակ թեկնածու առաջադրել, իսկ երբ առաջադրվեց և հաստատվեց պարոն Մեխակյանի թեկնածությունը համայնքի ղեկավարի պաշտոնում: Այստեղ այս խառնաշփոթը սկսվեց մի պարզ պատճառով. պարոն Մեխակյանը և՛ Էջմիածնում՝ որպես համայնքի ղեկավարի տեղակալ, և՛ Խոյում՝ որպես համայնքի ղեկավար, վաստակել է ձեր վստահությունը, և հասկանալի պատճառներով իր հետ մրցելն ընդդիմության ցանկացած թեկնածուի համար լինելու է բարդ, եթե չասեմ՝ անհնար»,- ասաց նա:
ԱԺ փոխնախագահ Հակոբ Արշակյանը, դիմելով բնակիչներին, նշեց, որ ՏԿԵՆ-ի նախաձեռնությամբ հնարավորություն է տրվում՝ միասնաբար ընտրելու նոր համայնքապետ, ապա կոչ արեց գնալ, մասնակցել ընտրությանն ու որոշիչ ձայն ասել. «Ձեր ընտրության իրավունքը մեզ համար սրբություն սրբոց է»:
Հիշեցնենք, որ Ազգային ժողովում երկրորդ ընթերցմամբ քննարկվում են «ՀՀ վարչատարածքային բաժանման մասին» և «Տեղական ինքնակառավարման մասին» օրենքներում առաջարկվող լրացումներն ու փոփոխությունները, որոնցով առաջարկվում է ձևավորել Արմավիրի մարզի Վաղարշապատ համայնքային փունջը, որը ներառում է ներկայիս Վաղարշապատ և Խոյ համայնքները՝ վերջիններիս կազմում ընդգրկված 19 բնակավայրով: Առաջարկվող ծրագրում ներգրավված են լինելու 2 համայնք, 19 բնակավայր, որոնց միավորման արդյունքում ձևավորվելու է մեկ խոշորացված համայնք:
Ավելի վաղ Վաղարշապատ համայնքի ղեկավար Դիանա Գասպարյանը հայտարարել էր, որ այլևս չի զբաղեցնելու համայնքի ղեկավարի պաշտոնը: Ավելի ուշ ՏԿԵ նախարար Դավիթ Խուդաթյանը հայտարարել էր, որ «Քաղաքացիական պայմանագիր» կուսակցության նոր թեկնածուն Արգիշտի Մեխակյանն է։