ԵԱՀԿ գործող նախագահ Անն Լինդեն գրառում է արել Թվիթերում՝ ողջունելով Ադրբեջանի կողմից 15 հայ գերիների վերադարձը:
«Ողջունում ենք Հայաստան 15 գերեվարված հայերի վերադարձն ու Ադրբեջանին տեղեկատվության փոխանցումը, որը կօգնի ականազերծում իրականացնել: Վստահության ամրապնդման այս միջոցները կօգնեն համապատասխան մթնոլորտ ստեղծել ԵԱՀԿ Մինսկի խմբի համանախագահների հովանու ներքո բանակցությունները շարունակելու համար: Այս կարևոր քայլերը կողմերին ավելի մոտ կդարձնեն երկխոսությանը, կայունությանը և համապարփակ կարգավորմանը», – գրել է Լինդեն:
Նա շնորհակալություն է հայտնել Վրաստանի և ԱՄՆ կառավարություններին՝ արժեքավոր աշխատանքի համար, նաև ընդգծել ԵՄ խորհրդի նախագահի ու ԵԱՀԿ Շվեդիայի նախագահության գերազանց համագործակցությունը: «Այդ զարգացումները կենսական քայլ են Հարավային Կովկասում տարածաշրջանային գործակցության համար»,- ասել է Լինդեն:
Նա կոչ է արել Հայաստանին ու Ադրբեջանին հենվել այդ դրական քայլերի վրա՝ ազատ արձակելով ձերբակալվածներին և վերսկսելով բարձր մակարդակի բանակցությունները ԵԱՀԿ Մինսկի խմբի հովանու ներքո: