ՀԱՄԱՍ-ի կողմից վերահսկվող Գազայի առողջապահության նախարարությունը հայտնել է, որ վերջին երեք օրվա ընթացքում այդ հատվածում սովից մահացել է 33 մարդ, այդ թվում՝ 21 երեխա, 900 հազար երեխա տառապում է թերսնուցումից, հայտնում է BBC-ն։
ՄԱԿ-ի Մարդու իրավունքների գրասենյակն էլ հայտնել է, որ մայիսից ի վեր իսրայելական ուժերը սպանել են ավելի քան 1000 պաղեստինցու՝ Գազայի հատվածում սնունդ հայթայթելու փորձի ժամանակ, հիմնականում ամերիկացի կապալառուի կողմից կառավարվող օգնության կենտրոնների մոտ։
2 միլիոնից ավելի բնակչություն ունեցող պաղեստինյան տարածքում, որը, փորձագետների կարծիքով, սովի վտանգի տակ է Իսրայելի շրջափակման և գրեթե երկամյա հարձակման պատճառով, հուսահատությունը մեծանում է։ Օրենքի և կարգուկանոնի խախտումը հանգեցրել է լայնածավալ թալանի ու նպաստել է օգնության մատակարարումների շուրջ քաոսի և բռնության, գրում է AP-ն։
Իսրայելի իշխանությունները բազմիցս հերքել են մեղադրանքները, թե դիտավորյալ սովամահ են անում Գազայի բնակչությանը։ Նրանք վստահեցնում են, որ թույլատրում են սննդամթերքի և այլ մարդասիրական օգնության մուտքը տարածք ու նշում, որ մատակարարվել է 2000 տոննա մանկական սնունդ։