Վոլոդիմիր Զելենսկին Փարիզում հանդիպել է եվրոպացի առաջնորդների և ԱՄՆ նախագահի բանագնաց Սթիվ Ուիթքոֆի հետ: Օրակարգում են եղել Ուկրաինային տրամադրվելիք անվտանգության երաշխիքները, հակառուսական պատժամիջոցները և գերիների վերադարձի հարցը:
Զելենսկու խոսքով՝ քննարկել են Կիևին աջակցող երկրների պատրաստակամությունը՝ նպաստելու ցամաքում, ծովում, օդում և այլ ոլորտներում Ուկրաինայի անվտանգությանը։
«Ուժեղ բանակը կլինի մեր անվտանգության հիմնական երաշխիքը»,- նշել է Ուկրաինայի նախագահը։
Հաղորդվում է, որ Արևմուտքը մտադրություն է հայտնել հեռահար հրթիռներ տրամադրել Կիևին: Նաև 26 երկիր պարտավորվել է հրադադարից հետո ուժեր տեղակայել Ուկրաինայում:
Էմանուել Մակրոնը նշել է՝ եթե Մոսկվան շարունակի հրաժարվել խաղաղ բանակցություններից, Եվրոպան՝ Վաշինգտոնի հետ համակարգմամբ, Ռուսաստանի դեմ նոր պատժամիջոցներ կսահմանի:
Զելենսկին և եվրոպացի պաշտոնյաները հեռախոսազրույց են անցկացրել Դոնալդ Թրամփի հետ: Նշվում է, որ Սպիտակ տան ղեկավարը կոչ է արել եվրոպական կողմին դադարեցնել ռուսական նավթի գնումը: Միացյալ Նահանգները նաև կարող է մասնակցել Կիևին անվտանգության երաշխիքների տրամադրման գործընթացին: