ՀՀ արտաքին գործերի նախարար Արարատ Միրզոյանը շնորհավորել է Իոաննիս Կասուլիդիսին Կիպրոսի Հանրապետության արտաքին գործերի նախարար նշանակվելու կապակցությամբ:
Հայաստանի ԱԳ նախարարը գրել է Թվիթերի իր պաշտոնական միկրոբլոգում:
«Անկեղծ շնորհավորանքներս եմ հայտնում Հայաստանի լավ բարեկամ Իոաննիս Կասուլիդիսին Կիպրոսի արտաքին գործերի նախարարի պաշտոնը ստանձնելու կապակցությամբ: Անհամբերությամբ սպասում ենք մեր արդյունավետ համագործակցությանը ի շահ Հայաստանի և Կիպրոսի բարեկամ ժողովուրդների», – նշել է արտգործնախարար Արարատ Միրզոյանը:
Իոաննիս Կասուլիդիսը արդեն երրորդ անգամ է նշանակվում Կիպրոսի ԱԳ նախարարի պաշտոնում: Նախկինում նա զբաղեցրել է այդ պաշտոնը 1997-2003 և 2013-2018 թթ.: Կասուլիդիսը երրորդ անգամ պաշտոնապես ստանձնել է Կիպրոսի արտգործնախարարի պաշտոնը 2022 թ. հունվարի 11-ին: