Վրաստանում ձերբակալվել են Թուրքիայում Ինտերպոլի կողմից հետախուզվող 12 քաղաքացի: Այս մասին հայտնում է Sputnik Грузия-ն:
«Նրանցից ութը Վրաստան են մուտք գործել մինչ Ինտերպոլի կողմից նրանց որոնման օրդերի տրամադրումը, իսկ չորսը՝ անօրինական ճանապարհով, ինչը հանգեցրել է լրացուցիչ քրեական քննությունների իրականացմանը», — հայտարարել է Վրաստանի քրեական ոստիկանության գլխավոր վարչության տնօրենի տեղակալ Իրակլի Դոնդոլաձեն։
Ձերբակալվածների թվում կան անձինք, որոնք մեղադրվում են ծանր և առանձնապես ծանր հանցագործությունների մեջ՝ դիտավորությամբ սպանություն ծանրացուցիչ հանգամանքներում (այդ թվում՝ անչափահասի սպանություն), սպանության փորձ, ավազակային հարձակում, մասնակցություն կազմակերպված հանցավոր խմբին և այլ մեղադրանքներ։
Կալանքներին նախորդել են լայնածավալ օպերատիվ-քննչական գործողություններ։ Դրանցում, վրացական գերատեսչություններից բացի, ներգրավված են եղել Ինտերպոլի Թուրքիայի բյուրոն, ինչպես նաև Թուրքիայի ոստիկանության և ժանդարմերիայի կցորդները Վրաստանում։