Ադրբեջանի նախագահ Իլհամ Ալիևը Չեռնոբիոյի միջազգային համաժողովում իր ելույթում հայտարարել է, որ Ադրբեջանի և Հայաստանի միջև խաղաղ բանակցությունների ընթացքը ցույց է տալիս, որ Հարավային Կովկասում հնարավոր է խաղաղության հասնել։ Ալիևը նշել է՝ խաղաղության պայմանագրի տեքստի շուրջ 80 տոկոսն արդեն համաձայնեցված է։
«Մենք արդեն հասել ենք սահմանների սահմանազատման, նույնիսկ սահմանագծման գործընթացի մեկնարկին։ Այո, սա առաջին փոքր քայլն է. համաձայնեցվել է Հայաստանի հետ սահմանի ընդամենը տասներեք կիլոմետրանոց հատվածը՝ հազար կիլոմետր ընդհանուր երկարությամբ։ Այնուամենայնիվ, սա քայլ է ճիշտ ուղղությամբ»,- ասել է Ադրբեջանի նախագահը՝ հույս հայտնել, որ խաղաղության պայմանագիր կստորագրվի։