Արևմտյան երկրներն Իսրայելի հետ վերաբերվում են որպես կամակոր երեխայի, իսկ Գազայի հատվածում նրանց դիրքորոշումը վախկոտ է և անամոթ՝ հայտարարել է Թուրքիայի նախագահը՝ ելույթ ունենալով Էր Ռիադում մեկնարկած Արաբական պետությունների լիգայի և Իսլամական համագործակցության կազմակերպության արտահերթ համատեղ գագաթնաժողովի բացմանը:
«Գազայում մոտ 20 հազար մարդ է զոհվել, բայց ոչ ոք բառ անգամ չի արտասանել։ Դա ոչ միայն նրանց անկարողությունն է, այլև միաժամանակ վախն ու խղճի բացակայությունը»,- ասել է Ռեջեփ Էրդողանը։
Նա հանդես է եկել ԻՀԿ-ի հովանու ներքո Գազայի վերականգնման համար հիմնադրամ ստեղծելու նախաձեռնությամբ։
Անդրադառնալով ՄԱԿ-ի Գլխավոր ասամբլեայի հոկտեմբերի 27-ին բանաձևին՝ Էրդողանը հայտարարել է, որ քվեարկության արդյունքները ցույց են տվել, որ Իսրայելին աջակցող երկրները փոքրամասնություն են կազմում: Բանաձևին կողմ էր հանդես եկել 121 երկիր, դեմ՝ 14 երկիր, այդ թվում՝ ԱՄՆ-ը։ Թուրքիայի նախագահը հույս է հայտնել, որ Արևմուտքն ականջալուր կլինի այդ քվեարկության արդյունքներին: