Արմեն Մելիքբեկյանն ու Վահրամ Դումանյանը քննարկել են ազգային մարզադաշտի կառուցման հարցը

ՀՀ կրթության, գիտության, մշակույթի և սպորտի նախարար Վահրամ Դումանյանը հյուրընկալել է Հայաստանի ֆուտբոլի ֆեդերացիայի նախագահ Արմեն Մելիքբեկյանին և փոխնախագահ Արմեն Նիկողոսյանին: «Արմենպրես»-ին այս մասին հայտնեցին ՀՀ ԿԳՄՍ նախարարությունից:

Այս տարի Հայաստանի ֆուտբոլի ֆեդերացիան նշում է հիմնադրման 30-ամյակը, ինչի կապակցությամբ ՀՖՖ-ն պատրաստվում է անցկացնել բազմաբնույթ միջոցառումներ: ՀՖՖ նախագահը Վահրամ Դումանյանին պաշտոնապես հրավիրել է ներկա գտնվելու անցկացվելիք միջոցառումներին և առաջարկել է նաև համատեղ ծրագրեր մշակել՝ ի նպաստ սպորտի, մասնավորապես ֆուտբոլի զարգացման:

ԿԳՄՍ նախարար Վահրամ Դումանյանն այցի համար շնորհակալություն է հայտնել ՀՖՖ ներկայացուցիչներին՝ ընդգծելով, որ նախարարությունը պատրաստ է համատեղ համագործակցության. «Եկե՛ք ամրագրենք, որ մենք միասին ենք ու պետք է ամեն ինչ անենք միասին: Պատրաստ ենք աջակցել և մեր ուժերի ներածին չափով օժանդակել՝ ի շահ հայկական ֆուտբոլի: Ամբողջ ազգն է ապրում ֆուտբոլով, ուրախանում մեր ֆուտբոլիստների հաջողություններով և ցավում անհաջողությունների համար»:

Ներկայացնելով Հայաստանի ֆուտբոլի ֆեդերացիայի իրականացրած աշխատանքները՝ Արմեն Մելիքբեկյանը նշել է, որ վերջին 1.5 տարում ՀՖՖ-ն Հայաստանի շուրջ 90 գյուղում փոքր դաշտեր է կառուցել. «Այսինքն՝ 90 համայնք ունի ֆուտբոլ խաղալու տեղ: Հատկապես գեղեցիկ է Ծովագյուղի դաշտը, որտեղից անմիջապես երևում է Սևանա լիճը»:

ՀՖՖ նախագահի խոսքով՝ ֆուտբոլի ֆեդերացիան մեծ տեղ է հատկացնում նաև կրթական ծրագրերին, մասնավորապես՝ սպորտային բժշկությանը. «Ընտրվել են մի քանի բժիշկներ, որոնք փետրվարին կմեկնեն Իսպանիա և վերապատրաստում կանցնեն հենց սպորտային բժշկություն մասնագիտացմամբ: Հայաստան վերադառնալուց հետո ՀՖՖ-ն իրենց հետ պայմանագիր կկնքի: Սպորտային բժշկության ճյուղը շատ արագ է զարգանում, սակայն Հայաստանում սպորտային բժիշկները շատ քիչ են»:

ԿԳՄՍ նախարար Վահրամ Դումանյանն առաջարկել է քննարկել նաև օտարերկրյա մասնագետներին Հայաստան հրավիրելու և վերապատրաստումը հենց մեր երկրում իրականացնելու տարբերակը:

Հանդիպման ընթացքում կողմերն արծարծել են նաև ֆուտբոլի մասսայականացմանը, ազգային մարզադաշտի կառուցմանը, Հայաստանում առաջին անգամ ֆուտբոլի սիրողական առաջնության անցկացմանն առնչվող և մի շարք այլ հարցեր:

Related posts

Փրկարարներն իրականացնում են քամու հետևանքով տապալված և կոտրված ծառերի մասնատման, հեռացման աշխատանքներ

ՀՀ տարածքը չի կարող օգտագործվել երրորդ պետությունների կողմից հարևան պետություններից որևէ մեկի դեմ ռազմական գործողություններ իրականացնելու համար. ԱԳՆ մամուլի խոսնակ

Փարիզում 100 տարվա մեջ առաջին անգամ թույլատրել են լողալ Սեն գետում