Այսօր պաշտոնապես դադարեցվել է Սևանա լճից ոռոգման նպատակով իրականացվող ջրառը։ Այս նպատակով Ջրային կոմիտեի, Շրջակա միջավայրի նախարարության, Ներքին գործերի նախարարության և «Ջրառ» ՓԲԸ-ի ներկայացուցիչների մասնակցությամբ իրականացվել է «Սևան» ՀԷԿ-ի ջրընդունիչի աջ և ձախ վահանակների վերամբարձ մեխանիզմների շարժաբերների կնքումը։ Այս մասին տեղեկացնում են Ջրային կոմիտեից։
«Սևան» ՀԷԿ-ի շարժաբերներն ապակնքվել էին հուլիսի 2-ին, և նույն օրը մեկնարկել էր Սևանա լճից ոռոգման նպատակով ջրառը։
Հատկանշական է, որ 2026 թվականի ոռոգման շրջանն ավարտվել է Սևանա լճից ջրառի՝ վերջին 65 տարվա ամենացածր ցուցանիշով՝ ընդամենը 75.3 մլն խմ։ Ի համեմատություն՝ 2025 թվականին Սևանա լճից ոռոգման նպատակով իրականացվել էր 180.1 մլն խմ ջրառ։
Միաժամանակ, 2026 թվականին «Արփա-Սևան» համակարգով Սևանա լիճ է տեղափոխվել 183.5 մլն խմ ջուր, որը 2025 թվականի համեմատ 73.5 մլն խմ-ով ավելի է։ Արդյունքում՝ նախորդ տարվա համեմատ Սևանա լճի մակարդակը բարձրացել է 21 սմ-ով։
Սևանա լճից ջրառի նվազման ցուցանիշն առավել ընդգծվում է նախորդ տարիների համեմատությամբ։ Մասնավորապես, 2006, 2007, 2010 և 2011 թվականներին, երբ Հայաստանում հիմնական ջրամբարների լցվածությունը համադրելի էր ընթացիկ տարվա ցուցանիշներին, Սևանա լճից ջրառը տատանվել է 152-170 մլն խմ միջակայքում։