Հինգշաբթի՝ նոյեմբերի 20-ին, Ստամբուլի նավահանգստի իշխանությունները թույլ չեն տվել հիմնականում ռուսաստանցի զբոսաշրջիկներ տեղափոխող Astoria Grande զբոսանավին մտնել նավահանգիստ։ Արդյունքում՝ վաղ առավոտից մինչև ժամը 15:00-ը խարսխված նավն ուղևորվել է նավարկության վերջնակետ՝ Սոչի՝ հաղորդել է РИА Новости-ն՝ հղում անելով նավի ներկայացուցչին։
Նա նշել է, որ նման իրավիճակ առաջին անգամ է տեղի ունենում։ Ավելի վաղ Astoria Grande նավը, որը նավարկում է Պալաուի դրոշի ներքո, բազմիցս մտել է Ստամբուլ։ Նավահանգստի ղեկավարությունը չի բացատրել իր որոշումը:
Թուրքական Anadolu գործակալությունը հայտնել է, որ Astoria Grande-ում եղել է 616 ուղևոր, հիմնականում ռուսաստանցիներ, ինչպես նաև անձնակազմի 435 անդամ: Նավարկության ընթացքում նավն այցելել է Անթալիայի, Ալանիայի և Իզմիրի նավահանգիստներ։