Ռուսաստանի և Միացյալ Նահանգների հարաբերությունների կարգավորման գործընթացն այնքան էլ լավ առաջ չի գնում՝ հայտարարել է Կրեմլի խոսնակը: Դմիտրի Պեսկովը նշել է, որ Մոսկվան կցանկանար ավելի մեծ դինամիկա տեսնել այդ հարցում: Նրա համոզմամբ՝ «առաջ շարժվելու համար» երկու կողմն էլ պետք է համապատասխան ազդակներ տան։
«Մենք հետաքրքրված ենք հարաբերությունների կարգավորմամբ և հուսով ենք, որ արդյունքի կհասնենք»,- շեշտել է ռուս պաշտոնյան: Ինչ վերաբերում է Թրամփ-Պուտին հնարավոր հանդիպմանը՝ Դմիտրի Պեսկովը նշել է, որ այդ ուղղությամբ առարկայական քննարկումներ չեն տարվում:
Կրեմլի խոսնակն անդրադարձել է ռուս-ուկրաինական հակամարտությանը, վստահեցրել՝ Մոսկվան հավատարիմ է կարգավորման խաղաղ գործընթացին և կանի հնարավորը՝ պաշտպանելու Ռուսաստանի շահերը:
«Հատուկ ռազմական գործողությունը շարունակվում է»,- ընդգծել է Պեսկովը։
Նա հավելել է՝ ռուսական կողմն ի գիտություն է ընդունել Թրամփի հայտարարությունը, որ իրեն այլևս այnքան էլ չի հետաքրքրում Պուտինի հետ հանդիպումը, իսկ Վաշինգտոնը հակամարտությունը լուծելու համար 50-օրվա փոխարեն արդեն 10-12 օր է տալիս Մոսկվային:
Պեսկովը մեկնաբանել է Կիևի հայտարարությունը, որ ՌԴ զինված ուժերը հարվածել են Զապորոժիեի մարզի գաղութին, ինչի հետևանքով մի քանի տասնյակ մարդ է զոհվել և վիրավորվել:
Վոլոդիմիր Զելենսկին նշել է, որ դա միտումնավոր է արվել:
«Ռուսական բանակը չի հարվածում քաղաքացիական թիրախներին: Հարվածներ են հասցվում միայն ռազմական և կիսառազմական ենթակառուցվածքներին»,- հակադարձել է Դմիտրի Պեսկովը։