Այս գիշեր ռուսական ուժերը հրթիռներով և անօդաչու թռչող սարքերով զանգվածային հարվածներ են հասցրել Ուկրաինային: Կիևի առնվազն չորս շրջաններում դրոնները հարվածել են բազմահարկ բնակելի շենքերին, հրդեհներ են բռնկվել։
Քաղաքապետ Վիտալի Կլիչկոն հայտնել է մեկ զոհի և ինը տուժածի մասին, որոնց թվում 13-ամյա դեռահաս է: Ավելի ուշ լրատվամիջոցները նշել են ևս վեց տուժածի մասին:
Հարվածների է ենթարկվել նաև Կիևի մարզը. Բրովարի շրջանում հրդեհ է բռնկվել բնակելի բազմահարկ շենքում, պաշտոնական տվյալով՝ տուժել է առնվազն երեք մարդ:
Ռուսական ուժերը հարվածել են նաև Խարկովին և Դնեպրին։ Խարկովի մարզի իշխանությունները հայտնել են, որ ՌԴ-ն հարվածել է էներգետիկ ենթակառուցվածքներին, սակայն մանրամասներ չեն ներկայացրել: