Ուկրաինայի շուրջ ստեղծված իրավիճակը կարող է կարգավորվել, եթե երկիրը ապառազմականացվի և հրաժարվի ՆԱՏՕ-ին անդամակցելուց։ Այդ մասին երեքշաբթի հայտարարել է ՌԴ նախագահ Վլադիմիր Պուտինը։
Իրավիճակը կարգավորելու համար Ռուսաստանի նախագահը ժողովրդավարական երկրներին մի շարք առաջարկություններ է ներկայացրել: «Առաջին հերթին նրանք պետք է ճանաչեն Ղրիմի թերակղզու բնակիչների որոշումը՝ վերամիավորվել Ռուսաստանի հետ»,- ասել է Պուտինը:
Ուկրաինան պետք է կամավոր հրաժարվի Հյուսիսատլանտյան դաշինքին միանալուց: Պուտինը նաև պահանջել է, որ Արևմուտքը դադարեցնի «Կիևի ներկա իշխանություններին ժամանակակից զինատեսակներով հարստացնելը»։
Մոսկվան չի կարող թույլ տալ Կիևի վերադարձը միջուկային կարգավիճակին, ինչի մասին հայտարարում են Ուկրաինայի իշխանությունները: «Նույնիսկ մարտավարական միջուկային զենքի հայտնվելը Ուկրաինայում նշանակում է ռազմավարական սպառնալիք մեզ համար»,- ասել է ՌԴ նախագահը։
Դոնեցկի և Լուգանսկի կարգավիճակների վերաբերյալ Պուտինն ընդգծել է, որ Մինսկի համաձայնագրերը ոչնչացվել էին Դոնբասի ժողովրդական երեկվա ճանաչումից շատ առաջ։
Նա հաստատել է, որ Ռուսաստանը ճանաչում է ԴԺՀ-ն և ԼԺՀ-ն իրենց սահմանադրությամբ հաստատված սահմաններով: «Բայց մենք ակնկալում ենք, ուզում եմ սա ընդգծել, որ բոլոր վիճելի հարցերը կլուծվեն Կիևի ներկա իշխանությունների և այդ հանրապետությունների ղեկավարության միջև բանակցությունների ընթացքում»,- ասել է ՌԴ նախագահը: «Մոսկվան Դոնեցկին և Լուգանսկին կտրամադրի «համապատասխան օգնություն, այդ թվում՝ ռազմական, սակայն Դոնբաս զորքեր ուղարկելու մասին ոչ ոք այս պահին չի հայտարարել։ Մոսկվայի հետագա գործողությունները կախված կլինեն «տեղում ձևավորվող կոնկրետ իրավիճակից»,- հավելել է Վլադիմիր Պուտինը: