ՊԵԿ նախագահը՝ շրջհարկի փոփոխությունների առնչությամբ քաղաքացիների դժգոհությունների մասին

Ես անձամբ տարբեր ակցիաների ներկայացուցիչների հետ հանդիպել եմ, բացատրել ենք խնդրի էությունը: Բանն այն է, որ մարդիկ անհանգստանում են փաստաթղթավորել իրենց վաճառքները և իրենց ձեռքբերումները՝ ավելի շատ նախընտրելով մնալ ստվերում: Այս մասին խորհրդարանում ասաց ՊԵԿ նախագահ Էդուարդ Հակոբյանը՝ լրագրողների հետ զրույցում անդրադառնալով շրջանառության հարկի փոփոխություններին և այդ առնչությամբ քաղաքացիների դժգոհություններին ու բողոքի ակցիաներին:

«Կառավարությունն ընդառաջ գնաց, ներդրեցինք աջակցության 6-ամսյա ծրագիր, որից օգտվելով՝ շրջանառության հարկ վճարողները այդ ժամանակաշրջանի համար կարող էին իրենց հարկային պարտավորությունները նույն մակարդակում պահել, մինչև կհարմարվեն այդ փաստաթղթավորմանն ու նոր հաշվառման ռեժիմին:

Եթե նայում ենք առաջին եռամսյակին, դիմորդները քիչ են, ինչը վկայում է այն մասին, որ մարդիկ ավելի շատ նախընտրում են մնալ ստվերում, քան դուրս գալ»,- ասաց Հակոբյանը:

Նրա խոսքով՝ շատերը նույնիսկ չեն հասկանում, որ այս նույն համակարգի պայմաններում իրենց հարկը կարող է նույնիսկ նվազել, իսկ բարձրացումների դեպքում էլ՝ դրանք շատ չնչին են, հետևաբար խոսել այն մասին, որ հարկերը բարձրացել են, տեղին չէ:

«Այստեղ ուղղակի նոր փաստաթղթավորման, գույքագրման նոր ռեժիմի հարմարվելու հարց է: Մենք չենք ուզում, որ ստվերում մնան գործարքները: Իսկ ստվերում մնալու դեպքում խոշորներն էլ են տեղավորվում այդտեղ, մարդիկ էլ են մնում այդ փոքր չափի գործունեության մեջ և հնարավորություն չեն ունենում աճելու և իրենց ներդրումը ունենալու պետական բյուջեի մեջ»,- նշեց ՊԵԿ նախագահը՝ ընդգծելով, որ իրենք բոլորին ծանուցել են, նույնիսկ ձևերն են մշակել՝ գույքագրելու ապրանքները, էլեկտրոնային եղանակով բոլորի հետ աշխատանք են տանում, պատասխանում են բողոքներին:

Սակայն ամենահետաքրքիրը, ըստ Հակոբյանի, այն է, որ այդ բոլոր բողոքներից հետո, երբ իրենք նայում են վիճակագրությանը, շրջանառության հարկի համակարգում տնտեսվարողների թիվն ավելացել է:

Նրա խոսքով՝ տնտեսվարողները պետք է կարողանան հարմարվել այս նոր ռեժիմին:

Related posts

ՔՊ վարչության նիստում քննարկվել են կուսակցական, քաղաքական և հանրային կարևորություն ունեցող հարցեր

Սահմանազատման գործընթացի վերաբերյալ բոլոր հարցերը քննարկվում են բացառապես պետական հանձնաժողովների համատեղ աշխատանքների շրջանակներում․ Մհեր Գրիգորյանի գրասենյակ

Աննա Հակոբյանը բարձրագույն կրթությունը կշարունակի Չինաստանում, Մարինե Հակոբյանը կսովորի Խաչատուր Աբովյանի անվան մանկավարժական համալսարանում