Շիրակի մարզպետ Դավիթ Առուշանյանի հանձնարարությամբ Արտակարգ իրավիճակների հետևանքով հասցված վնասների գնահատման Շիրակի մարզային հանձնաժողովն այսօր մարզպետի տեղակալ Ալբերտ Այվազյանի գլխավորությամբ իրականացրել է շրջայց մարզի առավել տուժած համայնքներում։
Շրջայցի ընթացքում հանձնաժողովի անդամներն այցելել են Գյումրու կարկտահարությունից տուժած թաղամասեր, տեղում հանդիպել բնակիչներին, որոնք ահազանգերով դիմել են համապատասխան կառույցներին։ Քննարկվել են հասցված վնասների ծավալները, արձանագրվել բնակելի տների, շինությունների և ենթակառուցվածքների վնասման դեպքերը։
Այնուհետև հանձնաժողովն այցելել է Հայկավան և Առափի բնակավայրեր, որոնք նախնական գնահատականներով, առավել մեծ վնասներ են կրել կարկտահարությունից։
Վնասների գնահատման գործընթացն իրականացնելու է յուրաքանչյուր համայնքի հանձնաժողով։
Համայնքային հանձնաժողովները շարունակելու են ընդունել քաղաքացիների դիմումներն ու ահազանգերը՝ հնարավորինս ամբողջական պատկեր կազմելու համար։