Կրեմլում մեկնաբանել են Երևանից հնչող այն հայտարարությունները, թե Նիկոլ Փաշինյանը ՌԴ նախագահ Վլադիմիր Պուտինի հետ զրույցից հետո եկել է այն եզրակացության, որ «Իսկանդեր» համալիրների վերաբերյալ իրեն սխալ են զեկուցել, «ՌԻԱ Նովոստի»-ին հայտնել Է ՌԴ նախագահի մամուլի քարտուղար Դմիտրի Պեսկովը:
«Շատ կարևոր է, որ այդ հարցում ճշմարտությունը վերականգնված է»,- ասել է Պեսկովը:
Ավելի վաղ «Արմենպրես»-ի հետ զրույցում ՀՀ վարչապետի խոսնակ Մանե Գևորգյանը հայտնել էր, որ ՀՀ վարչապետը և Ռուսաստանի Դաշնության նախագահը վերջերս կայացած հեռախոսազրույցի ընթացքում ի թիվս այլ հարցերի՝ քննարկել են նաև Հայաստանի կողմից «Իսկանդեր» համակարգի կիրառման վերաբերյալ ՀՀ վարչապետի հայտարարությունը։
«Հայաստանի վարչապետն առկա փաստերի և տվյալների համադրության արդյունքում եկել է եզրակացության, որ իրեն այս իրավիճակի առնչությամբ ճիշտ չի զեկուցվել: Ավելին, վարչապետի հայտարարությունը ոչ մի կապ չունի ռազմական և ռազմարդյունաբերական համագործակցության ոլորտում հայ-ռուսական դաշնակցային հարաբերությունների բովանդակության ու որակի հետ: Կասկած չի հարուցում և այն հանգամանքը, որ ռուսական զենքը լավագույններից է աշխարհում: Հայաստանի Հանրապետությունը շարունակում է սերտ համագործակցությունը Ռուսաստանի Դաշնության հետ՝ ռազմական արդյունաբերության և բարձր տեխնոլոգիաների ոլորտներում և մտադիր է քայլեր ձեռնարկել այն էլ ավելի խորացնելու ուղղությամբ»,-նշել էր Գևորգյանը:
Հիշեցնենք, որ օրերս 1in.am-ին տված հարցազրույցում Նիկոլ Փաշինյանը ակնարկել էր, որ վերջին պատերազմում կիրառված «Իսկանդեր»-ն ամբողջ հզորությամբ չի պայթել։
«Իսկ գուցե պատասխանե՞ն՝ իսկ ինչո՞ւ կրակած «Իսկանդեր»-ը չի պայթել կամ պայթել է, օրինակ՝ 10 տոկոսով»,- ասել էր Փաշինյանը։
Ճշտող հարցին, թե այդպե՞ս էլ է լինում, վարչապետը պատասխանել էր․ «Չգիտեմ: 80-ականների զե՞նք էր գուցե»: