ԱՄՆ-ը զորքեր չի տեղակայելու Սիրիայում, սակայն դիվանագիտական և տնտեսական ճանապարհով շատ բան կարող է անել այնտեղ փոքրամասնություններին պաշտպանելու համար: Այդ մասին հայտարարել է ԱՄՆ փոխնախագահ Ջեյ Դի Վենսը:
Նրա խոսքով՝ ԱՄՆ վարչակազմը պետք է «հիշի, թե ում հետ գործ ունի Սիրիայում, և ապահովի այդ պատմական համայնքների պաշտպանությունը»:
Վենսը հավելել է, որ Վաշինգտոնը բանակցություններ է վարում իր դաշնակիցների հետ և աշխատում է կուլիսներում, որպեսզի Սիրիայի վարչակազմին դրդի՝ պաշտպանելու քրիստոնյաների, դրուզների և այլ փոքրամասնությունների իրավունքները: ԱՄՆ փոխնախագահի խոսքով՝ այն, ինչ տեղի ունեցավ Սիրիայում փոքրամասնությունների հետ, շատ վատ է: