Համայնքների խոշորացման եւ միջհամայնքային միավորումների ձեւավորման հայեցակարգը հավանության է արժանացել 2011թ.-ին: Շիրակի մարզում համայնքների առաջին միավորումը եղել է 2016թ., իսկ արդեն 2021թվականի դեկտեմբերի 5-ի ՏԻՄ ընտրություններից հետո եղավ խոշորացման հաջորդ փուլը, որի արդյունքում մարզը, բացի մարզկենտրոն Գյումրուց, ունի խոշորացված 5 համայնք : Համայնքների բնակիչների խոսքով՝ միավորումը խնդիրներ է առաջացրել իրենց համար. այս մասին խոսում են ինչպես հիմա, այնպես էլ 2021թվականի խոշորացման նոր փուլից առաջ: Օրինակ, ՇՄ Անի խոշորացված համայնքի Քարաբերդ բնակավայրում 2021թվականին բողոքում էին, որ մի քանի ամիս է՝ խմելու ջուր չի հասնում գյուղ: Նմանատիպ խնդիր նախկինում էլ եղել է, բայց հիմա լուծումը ձգձվում է հենց խոշորացման պատճառով. նշում են բնակիչները, մինչ խոշորացումը կար գյուղապետ, որին դիմում էին ուղիղ իրենց խնդրով, հիմա վարչական ղեկավար է, իսկ խնդրի լուծումը պետք է փնտրել խոշորացված համայնքի կենտրոնում. նշում են գյուղացիները: