Դա մեր հաղթանակն է, մենք 300 հազար զոհ ենք տվել և գնում ենք տոնելու մեր հաղթանակը ֆաշիզմի դեմ: Այդ մասին խորհրդարանական ճեպազրույցի ժամանակ հայտարարեց ԱԺ նախագահ Ալեն Սիմոնյանը՝ անդրադառնալով Մայիսի 9-ի կապակցությամբ վարչապետ Նիկոլ Փաշինյանի՝ Ռուսաստանի Դաշնություն այցին:
«Կարծում եմ, որ պետք է մասնակցի: Ենթադրում եմ, որ, այո՛, կմասնակցի»,- ասաց նա:
Ալեն Սիմոնյանը նաև ընդգծեց՝ այդ միջոցառումներին մասնակցությունը նաև միջազգային տարբեր շփումներ ունենալու և պայմանավորվածություններ ձեռք բերելու հնարավորություն է:
«Այսինքն՝ բոլորը բոլորի հետ պիտի խոսեն, իսկ մենք, որպեսզի բոլորին չնեղացնենք, պետք է փորձենք բոլորի համար լա՞վը լինել:
Կա ՀՀ շահ, կա ՀՀ կարծիք, որ ես այս կարծիքն ունեմ, ես այս ուղղությունն ունեմ, ու գործողություններ, որոնք անում ենք միջազգային հարթակներում: Թե ո՞վ կգնա այնտեղ, ո՞ւմ կժպտա, ո՞ւմ կբարևի՝ դա քաղաքականություն է: Ինչպես ասել եմ՝ քաղաքականությունը մեծ առևտուր է»,- ասաց ԱԺ խոսնակը: