«2017 թվականի համեմատությամբ 2025 թվականի կատարված բյուջեի եկամտային մասը միայն ավելի քան 130 տոկոսով ավելի է»:
Այս մասին Ազգային ժողով-Կառավարություն հարցուպատասխանի ժամանակ ասաց վարչապետ Նիկոլ Փաշինյանը՝ անդրադառնալով պաշտոնյաներին պարգևավճար տալուն առնչվող քննադատություններին և այն նախադրյալներին, որոնց հիման վրա հնարավոր է եղել պարգևավճար տալ:
«Երկրորդը՝ ուզում եմ հիշեցնել, որ 2025-ի բյուջեում մենք պետական ապարատի պահպանման ծախսերը կրճատել ենք 4 տոկոսով, որը ընդհանուր առմամբ կազմում է 6,5 մլրդ դրամ, այսինքն՝ 2025 թվականին մենք պետական ապարատի ծախսերի, այդ թվում՝ աշխատավարձերի և այլնի ֆոնդը կրճատել ենք 6,5 մլրդ դրամով:
Սա մենք արել ենք հետևյալ տրամաբանությամբ, որ համարել ենք՝ պիտի մեխանիզմներ ստեղծենք, որպեսզի պետական ապարատը փնտրի և գտնի պետական բյուջեում անարդյունավետ ծախսող տեղեր, միավորներ, հաստիքներ, որոնց անհրաժեշտությունը չկա, բայց որոնց վրա գումար ենք ծախսում, և 2025-ին մենք 6,5 մլրդ դրամով փաստացի կրճատել ենք այդ ծախսերը, որից հետո ներդրել ենք կատարողականի վրա հիմնված վարձատրության համակարգ, որը պիլոտային ծրագիր է: Եվ մենք նպատակադրված ենք որոշակի փորձարկումների արդյունքում բերել և օրենքի տեսք տալ դրան»,- ասաց նա:
Փաշինյանը ևս մեկ անգամ հիշեցրեց, որ պարգևավճարի գումարը պետք է ուղղվի կրթությանը, դատարանում հարուցված գործերով ծախսերին, որակյալ կադրերի արտահոսքը կանխելուն, և որ պաշտոնյան չշեղվի իր բուն աշխատանքից: