Աբխազիայի նախագահ Ասլան Բժանիան լքել է հանրապետության մայրաքաղաք Սուխումը։
Տեղեկությունը ՏԱՍՍ-ի հետ զրույցում հաստատել է նախագահի մամուլի ծառայությունը՝ նշելով, որ Ասլան Բժանիան գտնվում է հայրենի Տամիշ գյուղում։
Նոյեմբերի 15-ին Աբխազիայի մայրաքաղաք Սուխումում մարդիկ բողոքի ցույց էին անցկացրել խորհրդարանի և նախագահական նստավայրի մոտ՝ ընդդեմ Ռուսաստանի հետ ներդրումային համաձայնագրի կնքման։ Սկզբում ցուցարարները բեռնատարով կոտրել էին խորհրդարանի շենքի դարպասներն ու ներխուժել, ապա շրջափակել նախագահականը:
Ցուցարարները պահանջել են նախագահի անհապաղ հրաժարականը: Նրանք ձվեր ու շշեր էին նետել ոստիկանների ուղղությամբ, որոնք իրենց հերթին ծխային ռումբեր էին օգտագործել։ Խորհրդարանի մոտ կրակոցներ էին հնչել: Բողոքի ակցիայի ժամանակ տուժել է ութ մարդ:
Նախագահ Ասլան Բժանիան հայտարարել է, որ ճնշումներն անընդունելի են։ Նաև բնակիչներին կոչ է արել չտրվել սադրանքներին: