Վրաստանի նախագահի նստավայրում տեղի է ունեցել Հայաստանի նախագահ Արմեն Սարգսյանի դիմավորման պաշտոնական արարողությունը, որից հետո Հանրապետության նախագահը գրառում է կատարել նախագահական պալատի պատվավոր հյուրերի գրքում, վստահեցրել, որ այցն ավելի կամրապնդի երկու ժողովուրդների բարեկամությունը:
«Շեշտեցի պատերազմի արդյունքում առաջացած հումանիտար հսկայական խնդիրները, այդ թվում՝ Ադրբեջանի կողմից գերիներին և պատանդներին կամ այն անձանց, որոնք այդպիսի կարգավիճակ ունեն, նրանց ազատ արձակման հարցում շուտափույթ լուծումներ գտնելու կարևորությունը: Սա շատ էական խնդիր է, և սա հումանիտար խնդիր է: Այս քաղաքականությունը չի կարող նպաստել երկխոսության մթնոլորտի ձևավորմանը»,- ասել է Արմեն Սարգսյանը:
«Պատերազմի ժամանակ առաջարկվել էր Վրաստանը դարձնել հանդիպումների ու երկխոսության հարթակ: Հիմա էլ մեր երկիրը կանգնած է խաղաղության կողմում և այդ առաջարկն ուժի մեջ է: Բոլորս հասկանում ենք, որ ցանկացած պատերազմ խաթարում է կայունությունը տարածաշրջանում, հետևաբար խաղաղությունն այլընտրանք չունի:
Նախագահ Սարգսյանի հետ քննարկել ենք տարածաշրջանի ապագան, տնտեսական բաղադրիչը, այս երկրները պետք է իրենց տարանցիկ ներուժն օգտագործեն և ունենանք բաց ու զարգացող տարածաշրջան: Քննարկեցինք նաև նոր նախաձեռնություններ՝ ինչպես նպաստել, որ մեր բիզնես դերակատարները սկսեն մտածել կոնկրետ նախագծերի մասին»,- ասել է Սալոմե Զուրաբիշվիլին: